Кремль хоригуудаа цуцлахыг шаардав

Вашингтоны төлөөлөгчид Москва, Киевийн талтай ээлжлэн хэлэлцээр хийсэн. Эдгээр уулзалтын үр дүнг Цагаан ордноос нийтлэв. Москва, Киевтэй тус тусад нь аюулгүй тээвэрлэлтийг хангах, хүч хэрэглэхээс зайлсхийх, Хар тэнгист цэргийн зориулалтаар арилжааны хөлөг онгоц ашиглахгүй байх талаар тохиролцсон гэжээ. Нэмж дурдахад, АНУ хоёр талтай хамтран “Эрчим хүчний байгууламжид цохилт өгөхийг хориглох хэлэлцээрийг хэрэгжүүлэх арга хэмжээ” боловсруулна. Киевтэй хийсэн хэлэлцээрээр олзлогдогсдыг солилцох, энгийн хоригдлуудыг суллах, хүчээр шилжүүлсэн Украины хүүхдүүдийг эргүүлэн авахад дэмжлэг үзүүлэхээ илэрхийлжээ. ОХУ-ын төлөөлөгчидтэй хөдөө аж ахуйн бүтээгдэхүүн, бордооны экспортын дэлхийн зах зээлд гарах боломжийг сэргээх, далайн тээврийн даатгалын зардлыг бууруулах, боомтод нэвтрэх, ийм төрлийн үйл ажиллагаа явуулах төлбөрийн системийг өргөжүүлэхэд АНУ туслахаа амлав. ОХУ-ын Гадаад хэргийн сайд Сергей Лавровын хэлснээр Москва Хар тэнгисийн санаачилгыг харилцан хүлээн зөвшөөрөгдөх хэлбэрээр шинэчлэхийг дэмжиж гэрээг сунгах  баталгаа  шаарджээ. Мөн Кремлийн бусад шаардлагын нэг нь хүнс, бордоо үйлдвэрлэдэг, экспортолдог компаниудад тавьсан хориг арга хэмжээгээ цуцлах юм.

Эх сурвалж: Монголын үнэн сонин №012/24639/