Б.Мөнхбаатар: Сэтгэлзүйтэйгээ ажилласнаар залуучуудын дэлхийн аварга болсон

Мөсөнд авиралтын дэлхийн чансааг Монголын баг тамирчид тэргүүлж байна. Насанд хүрэгчдийн дэлхийн аварга шалгаруулах тэмцээнд монгол тамирчин цойллоо. Залуучуудын дэлхийн аварга шалгаруулах тэмцээн өнгөрсөн нэгдүгээр сард болоход мөн л монгол тамирчид авхаалж самбаа, хурд хүчтэй байгаагаа харууллаа. Тэдгээр тамирчнаас энэ дугаарт Монголын уулчдын үндэсний холбооны спорт авиралтын тамирчин, залуучуудын дэлхийн аварга Б.Мөнхбаатарыг урьж ярилцлаа. Увс аймгийн Улаангом хотын нэгдүгээр сургуулийн төгсөх ангид сурдаг тэрбээр мөсөнд авиралтын залуучуудын дэлхийн аварга шалгаруулах тэмцээнээс мөнгөн медаль зүүж байсан өсвөрийн чансаа өндөр тамирчдын нэг юм. 

-Мөсөнд авиралтын залуу­чуудын дэлхийн аварга шал­гаруулах тэмцээнд амжилт­тай оролцож алтан медаль хүртсэнд баяр хүргэе. Ме­далийн өнгөө хувиргана гэж өөртөө өгсөн амлалтдаа хүрэхийн тулд тэмцээний бэлтгэлээ хэрхэн базаасан бэ?

-Баярлалаа. Энэ жил залуучуудын дэлхийн аварга шалгаруулах тэмцээнийхээ бэлтгэлийг арай эртээс хийлээ. Өнгөрсөн жил мөнгөн медаль авсан учраас энэ удаад тэмцээндээ түрүүлнэ гэсэн бодлоор эхлүүлсэн. Бас өмнөх жилийн дэлхийн аварга шалгаруулах тэмцээнээс хуримтлуулсан мэдлэг, турш­лага­даа үндэслэн өөртөө анализ хийхдээ сэтгэлзүйдээ голлон анхаарал хандууллаа. Үүний үр дүнд амжилтаа минут, секундээр нэмэх боломжтой болж өмнөх жилтэйгээ харьцуулбал бэлтгэлээ нэг шатаар ахиулж чадсан гэж бодож байна.            

-Газар орны байгалийн тогтоц, цаг агаараас шалтгаалан мөс нь ч харил­цан адилгүй байдаг. Та дэл­хийн аварга шалгаруулах тэмцээнээс өмнө Францад очиж мөсний байдалтай нь танилцсан уу?

-Газар орны тогтоц, цаг агаараас шалтгаалан мөс харилцан адилгүй байдаг гэдэгтэй санал нэг байна. Миний хувьд тэмцээн болохоос өмнө Франц яваагүй. Харин өмнөх жил нь дэлхийн аварга шалгаруулах тэмцээнд оролцсон туршлагатай тамирчдаас тухайн улсын мөс ямар онцлогтой талаар мэдээлэл авсан. 

-Таны оролцсон мөсөнд авиралтын хурдны төрлийн өрсөлдөөн секунд, долиор хэмжигддэг. Энэ жилийн хувьд та юунд анхаарснаар медалийн тавцанд зогсож чадсан бэ?

-Өмнө нь хэлсэнчлэн сэтгэлзүйдээ ихээхэн анхаарал хандуулсан. Энэ жил тэмцээнд амжилт гаргахад нөлөөлсөн гол зэвсэг миний хувьд сэтгэлзүй байлаа.

-Багштайгаа хамт бэлдэж байснаа энэ удаагийн дэлхийн аварга шалгаруулах тэмцээнд бүрэн дүүрэн гаргаж чадав уу?

-Тэмцээний дараа өөртөө дүгнэлт хийхэд байгаа болом­жоо бүрэн дүүрэн гаргаж чадаагүй юм шиг санагдсан. Техник болон бие бялдрын чадамж дутмаг байсан боло­хоор цөөнгүй алдаа гаргасан. Тэмцээний үеэр гаргасан тэдгээр алдаагаа цаашид бага багаар засаж чадна гэдэгт итгэлтэй байна.        

-Мөсөнд авиралт нь манай улсад хөгжиж байгаа спортын төрөл. Дэлхийн аварга болон олон улсын бусад тэмцээнд таныг авхаалж самбаагаа сорихоор очиход гаднын тамирчин, дасгалжуулагчид хэрхэн хүлээж авдаг вэ?

-Монголын тамирчдыг гаднын тамирчин дасгалжуулагчид найрсгаар хүлээн авдаг.

-Мөсөнд авиралтын хувьд зориулалтын хананаас гадна ууланд бэлтгэл хийж байв уу?

-Би Увс аймгийн уугуул. Манай аймагт өндөр хайрхан олон бий. Би тэдгээр хайрхнуудад авирч үзээгүй л байна. Цаашдаа авирч үзэх сонирхолтой байгаа.

-Та Улаангом хотын нэгдү­гээр сургуулийг энэ жил төг­сөнө. Цаашид спортоороо даг­нан суралцах уу?

-Энэ спортоороо хичээллэж тамирчны замналаа үргэлж­лүүлнэ гэсэн бодолтой байна.

-Одоо ямар тэмцээнд орол­цохоор бэлтгэж байна вэ?

-Оролцохоор төлөвлөж байгаа тэмцээн уралдаан одоогоор тодорхой болоогүй байна. Энэ хугацаанд бэлт­гэлээ хийнэ дээ. Ташрамд, за­луучуудын дэлхийн аварга шалгаруулах тэмцээнд орол­цоход бэлтгэж, мөнгө санхүү болон сэтгэлзүйтэй маань ажилласан Пүрэвсүрэн (Пүүсүү) багшдаа маш их баярлалаа.

Б.Сэлэнгэ  

Эх сурвалж: "Монголын үнэн" сонин №009/24588/