Мөсөнд авиралтын мастеруудыг онцоллоо

Биеийн тамир, спортын улсын хорооны дарга О.Баттулга мөсөнд авиралтын спортоор дэлхийн цомын цуврал тэмцээн болон дэлхийн аварга шалгаруулах тэмцээнээс медаль хүртсэн баг тамирчид, Монголын уулчдын үндэсний холбооны удирдлагуудыг хүлээн авч уулзжээ. Манай улсын мөсөнд авиралтын тамирчид 2024 оны эхний хоёр сарын байдлаар дэлхийн цомын цуврал тэмцээн, залуучууд, насанд хүрэгчдийн дэлхийн аварга шалгаруулах тэмцээнээс дөрвөн алт, хоёр мөнгө, гурван хүрэл нийтдээ есөн медаль хүртээд байгаа юм.

Манай тамирчдаас Франц улсад болсон залуучуудын дэлхийн аварга шалгаруулах тэмцээний хурдны төрөлд Б.Мөнхбаатар алт, А.Зоригт­баатар, Ц.Анар нар хүрэл, БНСУ-д болсон дэлхийн цомын тэмцээнээс Н.Хэрлэн алт, Ч.Мандахбаяр мөнгө, Швейцар улсад болсон дэлхийн цомоос Ч.Мандахбаяр алт, Канад улсад болсон насанд хүрэгчдийн дэлхийн аваргаас Н.Хэрлэн мөнгө, Н.Сэлэнгэ хүрэл медаль хүртсэн байна. Тэднээс Ч.Мандахбаяр дэлхийн цомын цуврал тэмцээний нийлбэр амжилтаар дэлхийн чансааг тэргүүлж, цомын эзэн болсон бол Б.Мөнхбаатар залуучуудын дэлхийн аваргаас Монголын баг тамирчдын анхны алтан медалийг авчирч, Н.Хэрлэн, Н.Сэлэнгэ нар насанд хүрэгчдийн дэлхийн аварга шалгаруулах тэмцээнээс медаль хүртсэн анхны монгол тамирчид билээ.

Баг тамирчдыг хүлээн авах арга хэмжээний үеэр БТСУХ-ны дарга О.Баттулга, Бодлого төлөвлөлтийн газрын дарга О.Гэрэл нар зарим тамирчныг шагнаж урамшуулсан бөгөөд Биеийн тамир, спортын жуух бичгээр У.Анар, Ж.Амина, А.Зоригтбаатар нарыг, Олон улсын хэмжээний мастер цол тэмдгээр Н.Сэлэнгэ, Б.Мөнхбаатар нарыг шагнасныг мэдээллээ.

Эх сурвалж: "Монголын үнэн" сонин №009/24588/