Зуны хитүүд хүлээлтээс давлаа

Холливуудын  зохиолч, жүжигч­дийн удаан үргэлжилсэн ажил хаялтын улмаас хойшилсон уран бүтээлүүд энэ сараас эхлэн нээлтээ хийж, олны хүлээлтийг тайллаа. "Оддын дайн"-аас эхлээд "Луугийн өргөө" болон түүнээс дутахгүй домогт "Баавгай" зэрэг асар их төсөвтэй төслүүд хэзээ, ямар стримингээр үзэгчдэд хүрч буйг сонирхуулж байна. 

“Аколит”
Нээлт: Зургадугаар сарын 4-нд “Disney+” 
“Оддын дайн”-ы шинэ анги энэ удаа детектив төрлөөр эргэн ирсэн. "Оддын дайн: I Episode - The Phantom Menace"-ээс бүтэн зуун жилийн өмнөх үйл явдлыг харуулна. Падаван болон Жеди Мастер хэд хэдэн гэмт хэргийг мөрдөн шалгаж, харгис, хүчирхэг хүчинтэй тулгарна. Жедичүүд хамгийн хүчирхэг байсан бөгөөд Ситийг галактикаас устгасан гэж үздэг байсан Өндөр Бүгд Найрамдах улсын оргил үеийн галактикийг дүрсэлжээ. Энэхүү цуврал нь алдартай жүжигчдийн цуглуулга болсноороо шүтэн бишрэгчдээ баярлуулжээ. "The Game of Squid" киноны од Ли Жон Жэ, Дафне Кийн, Кэрри-Эн Мосс, Лесли Хадланд нар дүр бүтээжээ. 

"Клипперс”  
Нээлт: Зургадугаар сарын 4-нд “Hulu” суваг
“Ялах цаг: Лэйкерсийн мандал” бол амжилт хэрхэн спортын салбарыг тодорхойлдог болохыг харуулсан бодит бүтээлд тооцогдож ирсэн. Тэгвэл  “Лос-Анжелес Клипперс”-ийнхэн өөрсдийн түүхийг кино урлагт мөнхөллөө. NBA-ийн хамгийн азгүй баг, тэдний  эзэн Дональд Стерлинг арьс өнгөөр ялгаварлан гадуурхах үзлийг тойрсон асар том дуулианы төвд өөрийгөө хэрхэн олсон тухай өгүүлжээ. "Клипперс" киног Кевин Брэй найруулжээ. “Матрикс” киноны од Лоуренс Фишберн  ахлах дасгалжуулагч Док Риверсийн дүрд, Эд О'Нил сагсан бөмбөгийн клубүүдийн эздийн нэг Дональд Стерлингийг дэлгэцнээ амьдруулжээ.

“Карл Лагерфельд” 
Нээлт: Зургадугаар сарын 7-нд “Disney+”
“Chanel”, “Fendi” брэндийн бүтээлч захирлаар ажиллаж байсан агуу Карл Лагерфельдийн тухай кино “Disney+” сувгаар гарч эхэллээ.  Намтарчилсан уран бүтээлүүд үзэгчдийн сонирхлоос ангид үлддэггүй. Загварын ертөнц, тайзны ард өрнөдөг бүхнийг гэрэл, сүүдэртэй нь энэ кинонд харуулдаг. Домогт дизайнерыг загварын салбарт Кайзер Карл хэмээн хүндэлдэг байв. Түүний Коко Шанелийн залгамжлагч болж, 1970-1980-аад онд томоохон загварын ордныг удирдсан тухай киноны үйл явдал өрнөнө. Мөн Лагерфельд болон Жака дэ Башера хоёрын эмгэнэлт хайрын түүх, Yves Saint Laurent брэндийн үүсгэн байгуулагч Пьер Бержетэй дайсагнаж байсан талаар харуулна. Энэхүү бүтээлийг Рафаэль Баккегийн “Кайзер Карл” номоос сэдэвлэн бүтээсэн бөгөөд гол дүрд Даниел Брюль тогложээ. 

"Гэм буруугүйн таамаглал" 
Нээлт: Зургадугаар сарын 14-нд “Apple TV+”
Скотт Туровын зохиолын найруулгыг манай цаг үеийн хамгийн үр бүтээлтэй шоу нэвтрүүлэгчдийн нэг Дэвид И.Кэлли худалдан авсан. 1990-ээд онд найруулагч Алан Пакула жүжигчин Харрисон Фордтой хамтран зохиолоос сэдэвлэн бүрэн хэмжээний триллер хийж байсан бол одоо гол дүрд Жейк Жилленхол тогложээ. Зохиол нь доод албан тушаалтантайгаа дотно харилцаа үүсгэсэн прокурорын тухай өгүүлдэг. Гэтэл бүсгүй учир битүүлгээр нас барсны дараа энэ хэргийг хариуцах үүрэг хүлээнэ.  Ашиг сонирхлын зөрчлийг нуун дарагдуулахын тулд мөрдөн байцаалтын ажлыг будилуулахыг оролддог. Энэ цувралд Рут Негга, Питер Сарсгаард нар дүр бүтээжээ. 

“Луугийн өргөө”
Нээлт: Зургадугаар сарын 16-нд "HBO"
“Хаан ширээний тоглоом” зохиолоос сэдэвлэсэн  шинэ цуврал ирэх ням гарагт нээлтээ хийнэ. Нээлтийн зартай зэрэгцэн тус кинонд тоглосон уран бүтээлчдийн нэрс, зураг тодорхой боллоо. Уг цувралд Оливиа Күүк, Мэтт Смит, Эмма Д'Арси нар тогложээ. 2019 онд дууссан "Хаан ширээний тоглоом"-ын үйл явдлаас 200 жилийн өмнө өрнөж буй "Луугийн өргөө" кинонд Данаерис Таргариен болон Хааны газар нутгийг шатаасан тухай дурдаагүй ч түүний өвөг дээдсийг харуулах болно. Арван ангит шинэ цуврал нь үзэгчдийг уран зөгнөлт үйл явдал, галаар тургих луу, цагаан шаргал үстэй Таргариены ертөнцөд эргүүлэн аваачих болно.

"Баавгай"
Нээлт: Зургадугаар сарын 27-нд “Hulu”
Чикагогийн нэгэн жижиг зоогийн газрын өдөр тутмын амьдралд үзэгчдийг шингээж, хоолны соёлын сэтгэл татам талыг найруулагч Кристофер Сторерын киноноос хараарай. "Баавгай" кинод Мишелин одтой тогооч ахынхаа зоогийн газрыг хөл дээр нь босгохын тулд нэр хүндтэй ажлаа орхиж байгаа тухай өгүүлнэ. Хурд, хүсэл тэмүүллийн түвшинд бие биеэсээ эрс ялгаатай байсан ч хоёулаа шүүмжлэгчид болон үзэгчдийн сэтгэлийг татна. Гол дүрд Жереми Аллен Уайт, Эбон Мосс-Бачрах, Айо Эдебири нар дүр бүтээсэн. 

“Миний хатагтай Жэйн”
Нээлт: Зургадугаар сарын 27-нд “Prime Video” 
VII Генри хааны ач охин хатагтай Жэйн Грейгийн  амьдралаас сэдэвлэсэн уг кинонд Тюдорын угсааны үеийн ордны амьдралыг уран сайхнаар дүрслэн өгүүлжээ. "Есөн өдрийн" хатан хаан гэгддэг хатагтай Грэй бол 1553 оны долдугаар сарын 10-19-нд Англи, Ирландыг захирсан язгууртан эмэгтэй юм. Энэ бол хаан ширээ залгамжилсан  хамгийн эмгэнэлтэй түүхийн нэг бөгөөд 17 настайдаа цаазлуулдаг. Цувралыг Жэйми Баббитт найруулж, гол дүрд Эмили Бадер, Доминик Купер, Жим Бродбент нар тогложээ.

 Х.Эрдэнэзаяа

Эх сурвалж: Монголын үнэн сонин №023/24602/