Хөдөлмөрийн баатар, Гавьяат тамирчин, Дархан аварга Жигжидийн Мөнхбатыг мөнхлөх гэрэлт хөшөөний нээлт Төв цэнгэлдэх хүрээлэнд өнөөдөр боллоо. Гэрэлт хөшөөний нээлтэд Дархан аварга Ж.Мөнхбатын хүү, мэргэжлийн сүмогийн 69 дэх их аварга М.Даваажаргал ээж Ө.Тамирын хамтаар, Дархан аварга Б.Бат-Эрдэнэ, Г.Өсөхбаяр, А.Сүхбат, Н.Батсуурь, Улсын аварга С.Мөнхбат тэргүүтэй хүчит бөхчүүд болон эрхэм хүндтэй зочид төлөөлөгчид хүрэлцэн ирж, хүндэтгэл үзүүлэв.
Ж.Мөнхбат 1941 оны могой жилийн 6 дугаар сарын 1-нд Төв аймгийн Эрдэнэсант суманд "Хадан" хошуу гэдэг газар эцэг Чанцал, эх Хажид нарын 11 хүүхдийн 10 дахь хүү болж төржээ. Тэрбээр Эрдэнэсант сумын 7 жилийн дунд сургууль төгсөөд Санхүүгийн Техникум улмаар Эдийн засгийн дээд сургуульд сурсан байна.
1960 онд Санхүүгийн Техникумд сурч байхдаа сумын заан болоод л дараа жил нь 60 жилийн ойгоор улсын заан цол хүртэж байжээ.
Ж.Мөнхбат Монгол Улсын чөлөөт бөхийн тамирчдаас олимп, дэлхийн АШТ-ий анхны медалийг эх орондоо авчирсан. 1967 онд Энэтхэг улсын Шинэ Дели хотноо болсон чөлөөт бөхийн ДАШТ-ээс хүрэл медаль хүртсэн бол дараа жил нь Мексикийн Мехико хотод зохиогдсон зуны олимпын наадмаас мөнгөн медалиар энгэрээ мялаажээ.
Ж.Мөнхбат үндэсний их баяр наадамд зургаан удаа (1963-1967, 1974) түрүүлсэн юм.
Дархан аварга Ж.Мөнхбат аваргын гэрэлт хөшөөг уран барималч Ж.Түмэнчулуун урласан байна.
Гэрэл зургуудыг МУСГЗ Т.Чимгээ
°C
Сэтгэгдэл (0)
Сэтгэгдэл бичигдээгүй байна