“Гладиатор 2” хүлээлттэй байна

Найруулагч Ридли Скотт “Гладиатор” киноныхоо хоёрдугаар ангийн зураг авалтаа дуусгажээ. 2000 онд дэлгэцнээ гарсан туульсын сэдэвт уг киноны нэгдүгээр анги 103 сая ам.доллароор бүтэж, 460.5 сая ам.долларын ашиг олсон. Тухайн жилийнхээ “Оскар”-ын наадмаас таван төрөлд шагнал хүртжээ.  Киноны гол дүрийг бүтээсэн Рассел Кроу шилдэг эрэгтэй жүжигчний  шагналыг хүртэж, дэлхий даяар алдаршсан юм. Сүүлийн 20 орчим жилийн турш “Гладиатор”-ыг хэрхэн үргэлжлүүлэх тухай янз бүрийн санаа олны дунд тарсан. Ингэхдээ өмнөх ангийнхаа  үйл явдлыг харуулна, эсвэл Максимусын хойд насыг үзүүлнэ гэж үзэгчид таамаглаж байлаа. Энэ бүх хугацаанд Ридли Скот киноныхоо хоёрдугаарыг найруулах хүсэлтэйгээ илэрхийлсээр ирсэн. Алдарт бүтээлийн тухай яриа намжиж, үзэгчид мартах шахаж байхад “Парамоунт” студи “Гладиатор 2” киног бүтээхээр ажиллаж байгаагаа зарлаж, шуугиан тарьсан билээ. Киноны гол дүрийг  Пол Мескал бүтээж байгаа бол  Дензел Вашингтон, Конни Ниэлсон нарын жүжигчин хамтран ажиллажээ. Киноны нээлтийг ирэх арваннэгдүгээр сарын 15-нд товлосон байна. 

Эх сурвалж: Монголын үнэн сонин №023/24602/