“The Hu” хамтлагийн тоглолтын тасалбарыг худалдаалж эхэлжээ

“The Hu” хамтлагийн эх орондоо зохион байгуулах анхны бүрэн хэмжээний тоглолт Архангай аймагт болно. Тус аймгийн Цэцэрлэг сум дахь “Ара” цэнгэлдэх хүрээлэнд болох тоглолтын тасалбар 95 мянган төгрөгийн үнэтэй. Тасалбарыг борлуулж эхлээд удаагүй байгаа юм. “The Hu” хамтлагийн тоглолтоос өмнө  тус цэнгэлдэхэд Монголын амьд хөгжмийн шилдэг хамтлагуудын тоглолт ирэх сарын 19-нд болно. Мөн долдугаар 13, 14-нд Монголын хөгжмийн ертөнцийн онцлог болсон этник хэв маяг, ардын өв соёл, хувцас өмсгөлийн уламжлалыг шингээсэн “Монгол поп” урсгалыг дэлхий дахинд сурталчлан таниулах “Монгол поп” хөгжмийн их наадам болох хуваарьтай байна. Түүнчлэн Өмнөд Солонгосын алдарт ди жей Сода манай улсад ирж, хөгжмийн сетүүдээ хүргэнэ. Ийнхүү өргөн хүрээнд зохион байгуулж буй “Ара” фестиваль нь хангайн бүс рүү аялагч, жуулчдын урсгалыг бий болгож Монголын нүүдлийн өв соёлыг таниулан сурталчлах, давтагдашгүй үнэт өв, урлагийн бүтээлийг толилуулах, олон улсын жуулчдад жил бүр үзүүлэх аялал жуулчлалын хангайн бүсийн бүтээгдэхүүнийг бий болгох зорилготой юм.

Эх сурвалж: Монголын үнэн сонин №023/24602/