Монгол Улсын Хүүхэлдэйн театр болон БНСУ-ын Соёл, спорт, аялал жуулчлалын яамны төслийг хэрэгжүүлэгч “Вандарлас” байгууллагын хамтарсан “Ода” төслийн талаар танилцууллаа. Төслийг танилцуулах хуралд Хүүхэлдэйн театрын захирал З.Баянзул, Соёлын яамны Гадаад харилцаа, хамтын ажиллагааны хэлтсийн мэргэжилтэн Б.Цэнгүүн болон БНСУ-аас ирсэн сургагч багш Им Жон Вин, Ну Сон Шин, Шим Сан Ханг, Жу Эй Ёон нар оролцож мэдээлэл өгөв. “Ода” төсөл нь Монголын уран бүтээлчдийн ур чадварыг нэмэгдүүлэх, хүүхэлдэйн урлагаар дамжуулан хүүхэд багачуудад соёл урлагийн боловсрол олгох зорилготой. Энэхүү төслийг хоёр дахь жилдээ амжилттай хэрэгжүүлж байгаа бөгөөд өнгөрсөн жил моно жүжиг зохиох арга барил, мөн жүжигчдийн ур чадварыг нэмэгдүүлэхэд анхаарчээ. Харин энэ жил Хүүхэлдэйн театрын уран бүтээлчдийн тавьсан хүсэлтийн дагуу хүүхэлдэйн урлагийн эртний төрөл болох сүүдрийн хүүхэлдэйн хамгийн сүүлийн үеийн тренд, арга барилын түүх, онцлог, гэрэл сүүдрийг ашиглах, сүүдрийн жүжиг найруулах зэрэг онол болон практик хосолсон хоёр долоо хоногийн сургалт хийхээр болсон байна. Энэхүү сургалт хоёр хэсэгтэй бөгөөд эхнийхэд нь театрын уран бүтээлчдийн ур чадварыг дээшлүүлэх чиглэлээр тодорхой ажлуудыг зохион байгуулна. Дараагийн хэсэгт соёл урлагийн чиглэлээр сургалт явуулдаг мэргэжлийн байгууллага, ерөнхий боловсролын сургууль, орон нутгаас ирсэн уран бүтээлчдийг хамруулсан сургалт хийхээр болжээ.
Г.Дорждагва
Эх сурвалж: Монголын үнэн сонин №023/24602/
°C
Сэтгэгдэл (0)
Сэтгэгдэл бичигдээгүй байна