Товчхон

Сагсан бөмбөг
"NBA Cup" тэмцээнийг зохион байгуулж "Лос Анжелес Лэйкерс" баг аваргаар тодорсон билээ. Тус тэмцээнд зориулан зохион байгуулсан "NBA 3x Invitational Champion" тэмцээнд оролцсон Монголын эмэгтэй, эрэгтэй баг хосоороо аваргалж цомын эзэд боллоо. Тус тэмцээнд оролцох урилгыг NBA-ээс МСБХ-нд өнгөрсөн сард ирүүлсэн юм. Эмэгтэй баг хэсгээсээ гурван хожилтойгоор гарч ирж, аваргын төлөө Япон улсын багийг илүүрхэн 16:6-аар хожсон. Харин манай эрэгтэй баг хэсэгтээ хоёр хожил нэг хожигдолтойгоор хэсгээсээ нэгээр гарч чадсан. Аваргын төлөө легионер тоглогчоор хүчээ зузаатгасан талбайн эзэн орны туршлагатай, хүчирхэг багтай эн тэнцүү өрсөлдөж 21:17 харьцаатай хожиж аваргаллаа.

PUBG Mobile
Монголын IHC Esports баг PUBG Mobile төрлийн дэлхийн аварга шалгаруулах тэмцээнд тэргүүлжээ. Тэд гурван өдрийн турш үргэлжилсэн тулааны эцэст 142 оноо цуглуулан аваргын цом өргөлөө. Турк улсад зохион байгуулсан PUBGM тоглоомын ДАШТ-д манай улсаас "IHC esports" багаас "4Merical vibes", "Stalwart esports" баг оролцсон юм. 138 оноо цуглуулсан "Stalwart esports" баг хоёрдугаар байр эзэлсэн бол "4Merical vibes" дөрөвт бичигдэн 144,000 ам.долларын шагнал хүртэж буй. Харин ДАШТ-д түрүүлсэн IHC Esports баг 453,500 ам.долларын шагнал хүртсэн байна. 

Теннис
Малайз улсын Пэрлис хотноо 41 дэх жилдээ зохион байгуулагдаж буй Газрын теннисчдийн өсвөрийн аварга шалгаруулах олон улсын тэмцээнд “Singapore School of Mongolia” сургуулийн сурагч А.Тулга оролцож, мөнгөн медаль хүртжээ. Түүний хувьд найм хүртэлх насныхны ганцаарчилсан төрөлд оролцсон байна. Энэ удаагийн тэмцээнд тэрбээр өвөөгийнхөө заавар зөвлөгөөтэй оролцож, ийнхүү амжилт гаргажээ. Өвөө нь Монголын анхны газрын теннисний багш, дасгалжуулагч Ж.Батжаргал юм.

Пауэрлифтинг
Тайланд улсын Ратчасима хотод дэлхийн хөгжлийн бэрхшээлтэй тамирчдын анхдугаар наадам боллоо. Тус наадамд манай улсаас пауэрлифтинг, буудлага спортын төрөлд хоёр тамирчин, хоёр дасгалжуулагч оролцсон юм. Наадмын пауэрлифтингийн 107 кг-ын жинд Монгол Улсын Гавьяат дасгалжуулагч Д.Баттулгын удирдлага дор оролцсон Хөдөлмөрийн баатар, Гавьяат тамирчин Э.Содномпилжээ алтан медаль хүртлээ. Тэрбээр цээжнээс 242 кг-ыг амжилттай шахсанаар төрийн дууллаа эгшиглүүлсэн юм. 

Эх сурвалж: Монголын үнэн сонин №047/24578/