Узбекистан улсын нийслэл Ташкент хотод хүндийн өргөлтийн насанд хүрэгчдийн Азийн аварга шалгаруулах тэмцээн боллоо. Парисын зуны олимпын наадмын эрхийн оноо олгох энэхүү тэмцээнд манай улсаас Гавьяат дасгалжуулагч Ц.Хосбаяр, дасгалжуулагч Б.Дэнсмаа нарын удирдлага дор 14 тамирчин өрсөлдөв. Тэмцээний эмэгтэйчүүдийн 64 кг-ын жинд Г.Ануужин мөнгө, 71 кг-ын жинд О.Төгс-Эрдэнэ хүрэл медаль хүртлээ. Г.Ануужингийн хувьд тивийн гурав дахь медалиа авч байна. Тодруулбал, тэрбээр 2022 онд хүрэл, 2023 онд алтан медалийн эзэн болж Азийн аварга тамирчин болсон. О.Төгс-Эрдэнийн хувьд өсвөрийн Азийн аварга шалгаруулах тэмцээнээс гурван алт, нэг хүрэл, залуучуудын тивийн аваргаас нэг мөнгөн медаль хүртэж байв. Түүнчлэн тэрбээр хүндийн өргөлтийн залуучуудын дэлхийн аварга шалгаруулах тэмцээнээс хүрэл медаль хүртсэн манай улсын шилдэг, залуу тамирчдын нэг юм. Сонирхуулахад, Монголын хүндийн өргөлтийн тамирчид насанд хүрэгчдийн ангилалд Азийн аварга шалгаруулах тэмцээнээс өмнө нь есөн алт, 33 мөнгө, 65 хүрэл (эмэгтэйчүүд зургаан алт, 14 мөнгө, 28 хүрэл, эрэгтэйчүүд гурван алт, 19 мөнгө 37 хүрэл ) медаль хүртэж байжээ.
°C
Сэтгэгдэл (0)
Сэтгэгдэл бичигдээгүй байна