Домогт хөлбөмбөгчин, дэлхийн гурван удаагийн аварга Пеле энэ сарын 29-ний пүрэв гаригт таалал төгсжээ. Пеле нэрээр хөлбөмбөгийн түүхэнд мөнхөрсөн Эдсон Арантес до Насименто 1958, 1962, 1970 онд шигшээ багаа дэлхийн аварга болгосон. Бразилийн төлөө 92 тоглолтод оролцож, 77 гоол оруулсан байна. ФИФА-гаас 2000 онд Пеле, Диего Марадона нарыг XX зууны шилдэг хөлбөмбөгчнөөр зарласан юм. Түүнийг таалал төгссөн тухай гашуудлын мэдээний дараа энэ цаг үеийн шилдэг хөлбөмбөгчид эмгэнэл илэрхийлжээ.
Неймар “Пелегээс өмнө "10" гэдэг зүгээр л тоо, хөлбөмбөг энгийн спорт байсан. Пеле түүхийг өөрчилсөн. Тэр хөлбөмбөгийг урлаг, хүн төрөлхтний баяр цэнгэл болгосон гавьяатай. Тэрбээр өнгөт арьстнуудын дуу хоолой болж, юу юунаас илүү Бразилийг алдаршуулсан. Тэр бол хаан. Хаан Пелегийн ачаар хөлбөмбөг болон Бразил улсын статус дээшилсэн билээ. Тэр үгүй ч ид шид нь үлдэнэ. Пеле үүрд мөнх” гэж бичжээ.
Лионель Месси “Пеле, Амар амгалан нойрсоорой” гэсэн байна.
Криштиан Роналдо “Бразилийн ард түмэн, Сенор Пелегийн гэр бүлд гүн эмгэнэл илэрхийлье. Пеле бол бидний мөнхийн хаан. Тэр олон сая хүнд урам зориг өгсөн. Түүний тухай дурсамж хөлбөмбөг сонирхогчдын дунд үүрд үлдэнэ. Тайван нойрсоорой” гэжээ.
Килиан Мбаппе “Хөлбөмбөгийн хаан таалал төгссөн ч түүний өв, гавьяа хэзээ ч мартагдахгүй” гэжээ.
Х.ЗАЯА
°C