БНХАУ-ын Ханжоу хотод болсон Азийн зуны спортын 19 дүгээр наадмын боксын эрэгтэйчүүдийн 63.5 кг-ын жинд Үндэсний шигшээ баг, дэлхийн аваргын мөнгөн медальт, Монгол Улсын Гавьяат тамирчин Б.Чинзориг түрүүлж, алтан медалийн салхийг хагаллаа. Тэрбээр шигшээ тулаанд Тайванийн тамирчин Чу Эн Лайныг ялснаар Төрийн дууллаа эгшиглүүлсэн юм. Түүний алтан медалийг Монголын үндэсний олимпын хорооны ерөнхийлөгч Б.Баттүшиг гардуулав. Энэ амжилтаараа Б.Чинзориг Азийн наадмын 49 жилийн түүхэн дэх Монголын багийн 25 дахь аварга болж байна. Шинэхэн аварга “Би анх 2014 онд Инчеоны Азийн наадамд оролцож байсан. Түүний дараа 2018 онд болсон Жакартагийн Азийн наадмаас мөнгөн медаль хүртэж байлаа. Энэ удаа Азийн наадмаас алтан медаль хүртсэн Монголын гурав дахь тамирчин болсондоо баяртай байна. Боксын холбооныхон маань том баг бүрдүүлж, тамирчдаа олон улсын түвшинд бэлтгэж чадсан нь биднийг амжилт гаргахад нөлөөллөө” гэсэн юм. Манай улсын баг тамирчид “Тегран-1974” Азийн зуны спортын наадамд анхлан оролцоход боксын 60 кг-ын жинд С.Гомбо мөнгө, 54 кг-ын жинд Б.Ганбат хүрэл медаль хүртэж байжээ.
°C
Сэтгэгдэл (0)
Сэтгэгдэл бичигдээгүй байна