ТОВЧХОН

Өнгөрсөн сард нээлтээ хийсэн “Ханжоу 2022” Азийн 19 дэх удаагийн наадамд манай улсын баг тамирчид өргөн бүрэлдэхүүнтэйгээр оролцлоо. Азийн наадамд Монгол Улсаас оролцсон баг тамирчид ямар амжилт гаргасныг тоймлон хүргэе.

Цахим спорт

Азийн наадмын И-спортын “Дота 2” төрөлд манай улсын “IHC Esports” баг мөнгөн медаль хүртлээ. Монголчууд анх удаагаа Азийн наадмын цахим спортын төрлөөс медаль хүртэж байгаа нь энэ юм. Тэд алтан медалийн төлөөх тоглолтдоо эзэн орны багтай таарсан юм. Эхний ээлжийн тоглолтод Монголын баг илт илүүрхсэн ч удаах тоглолтод Хятадын баг тоглолтын харьцааг тэнцүүлсэн. Улмаар гурав дахь тоглолтод Хятадын баг дахин ялалт байгуулснаар алтан медалийн эзэд болцгоов.

Сагсан бөмбөг

Наадмын 3х3 сагсан бөмбөгийн төрөлд Монголын эрэгтэй баг хүрэл медаль хүртлээ. Тус тоглолтод БНСУ-ын багийг 21:20 оноогоор хожиж, хүрэл медалийг эх орондоо авчирлаа. Түүнчлэн 3х3 эмэгтэй сагсан бөмбөгчид мөнгөн медалийн эзэн боллоо. Аваргын алтан медалийн төлөө тэмцээнийг зохион байгуулагч БНХАУ-ын шигшээ багтай өрсөлдөж, 12:21-ээр тэмцээнээ дуусгаснаар мөнгөн медаль авлаа.

Бокс

Боксын эмэгтэйчүүдийн 50 кг-ын жинд манай тулаанч, олон улсын хэм­жээний мастер О.Есүгэн хүрэл медаль хүртлээ. Тэрбээр хагас шиг­шээд эзэн орны тамирчинтай тулал­даж оноогоор ялагдал хүлээж хүрэл медалийн эзэн болов. Манай тамир­чин “Ханжоу 2022” Азийн наадмын хүрэл медалийн болзол хангаснаар “Парис 2024” олимпод оролцох эрхээ баталгаажууллаа.

Шатар

Азийн наадмын хөтөлбөрт найман жилийн дараа эргэн ирсэн шатрын төрөлд эрэгтэйчүүдээс их мастер С.Билгүүн, С.Ган-Эрдэнэ нар оюунаа сорив. Ма­най шатарчдаас их мастер С.Бил­гүүн 5.5 оноогоор долоо, олон улсын мастер С.Ган-Эрдэнэ 4.5 оноогоор 19 дүгээрт жагслаа. Ха­рин эмэгтэй шатарчдаас их мастер Т.Мөнх­зул 5.0 оноогоор 11-д, олон улсын мастер Б.Мөн­гөнтуул 5.0 оноо­гоор 13-д эрэм­бэлэгдэв.

Байт харваа

Байт харвааны ганцаарчилсан төрөлд Б.Отгонболд хагас шигшээд Казахстаны харваач Илфат Абдуллиныг 6:2-оор буулган авч, Азийн наадмын мөнгөн медалийн болзол биелүүлээд зогсохгүй “Парис 2024” олимпын эрхээ авлаа. Авар­гын төлөө эзэн орны харваач Жи Шиан Шоутай цэц мэргэнээ сорив. Манай улс өмнө нь Азийн наадмаас байт харвааны төрлөөр медальд хүрч үзээгүй. Ийнхүү анхны медалийг Б.Отгонболд авчирч, шинэ түүх бичлээ.