Хятадын үйлдвэрлэлийн бүс үерт автжээ

БНХАУ-ын өмнөд нутгийн Гуандун мужид хүчтэй аадар бороо орсны улмаас олон зуун мянган оршин суугчийг нүүлгэн шилжүүлжээ. Төрийн мэдээллийн “Синьхуа” агентлагийн мэдээлснээр, дөрвөн хүн эндэж, 36 байшин нурсан байна. Гол, мөрөн, усан сангууд эргээсээ хальсан учир Засгийн газраас 127 сая гаруй оршин суугчийг хамгаалах онцгой байдлын төлөвлөгөө хэрэгжүүлж эхэллээ. Гамшигт  нэрвэгдсэн хүмүүсийг хоол хүнс, хувцас, цэвэр ус, 25 мянган түр амьдрах байраар хангахыг орон нутаг, хотын хэлтэст даалгажээ. Сувдан голын бэлчир бол улсынхаа эдийн засгийн үсрэнгүй хөгжлийн бүс бөгөөд электрон тоног төхөөрөмж, тоглоом, хувцас, нэхмэл эдлэлийн үйлдвэрлэлийн бүс.  Мөн Хятадын худалдааны дийлэнх хувийг бүрдүүлдэг учир  байгалийн гамшгаас шалтгаалан нийлүүлэлтийн сүлжээ доголдож магадгүй. “Tesla”, “Apple”, “Huawei”, “Samsung” зэрэг технологийн аваргуудад  хуванцар нийлүүлдэг  үйлдвэрүүд үерт автжээ. 12 цаг үргэлжилсэн хүчтэй аадар бороо мужийн төв Гуанжоу болон Жаочин, Шаогуан, Чингюань, Жянмэнь хотыг дайрчээ. 18 сая хүн амтай Гуанжоу хотын эрчим хүчийг хэсэгчлэн сэргээсэн ч зарим дүүргийн барилгууд цахилгаангүй байна.  Олон улсын нисэх буудлыг түр хааж,  нислэгүүдийг цуцалжээ. Эрх баригчдын тооцоолсноор эдийн засгийн шууд алдагдал 40.6 сая юань буюу 19.8 сая ам.долларт хүрсэн. Хятадын цаг уурын албаны сэрэмжлүүлснээр аадар бороо үргэлжлэн орно. Бээжин, Тяньжин, Хэбэй мужийн нутгаар усархаг бороо орох төлөвтэй байна. Өнгөрсөн жил Номхон далайн хүчтэй хар салхины улмаас Бээжин болон Хэбэй муж үерт нэрвэгдсэн билээ. Ялангуяа Бээжинд 140 жилд ороогүй хур тунадас унасан.

Эх сурвалж: Монголын үнэн сонин №016/24595/