НҮБ гал зогсоохыг уриаллаа

НҮБ-ын Ерөнхий нарийн бичгийн даргын ажлын албанаас Израилын арми Газын зурвас дахь дунд сургууль руу дайрч, олон хүн амь үрэгдсэн тухай мэдэгдэл нийтэлжээ.  Ерөнхий нарийн бичгийн дарга Антонио Гутерриш энэ удаагийн Палестин Израилын мөргөлдөөн Газын зурвасын оршин суугчдын амь нас, аюулгүй байдалд ноцтой хохирол учруулж буй өнөөгийн нөхцөл байдлыг хатуу зэмлэсэн. Мэдэгдэлд, Аюулгүйн зөвлөлийн 2735 дугаар тоот тогтоолын агуулгыг хараахан хэрэгжүүлээгүйд  харамсаж буйгаа илэрхийлээд, мөргөлдөгч талууд дахин хэлэлцээр хийж, гал зогсоох, барьцаалагдсан хүмүүсийг суллах асуудлаар тохиролцоонд хүрэхийг уриалсан байна. Үүнээс гадна, Антонио Гутерриш нэн даруй гал зогсоож, барьцаалагдсан бүх хүнийг болзолгүйгээр суллахыг дахин уриалсан бөгөөд олон улсын хүмүүнлэгийн эрх зүйн хэм хэмжээг талууд заавал дагаж мөрдөх ёстойг онцлон тэмдэглэжээ. Түүнчлэн АНУ, Их Британи, Франц, Герман, Италийн удирдагчид Ойрх Дорнодын асуудлаар хэлэлцэж, Газын зурвас дахь мөргөлдөөнийг намжаах, гал зогсоох хэлэлцээрт хүрэх, барьцаалагдсан хүмүүсийг суллах асуудлаар гаргасан хүчин чармайлтыг бүх хүчээр дэмжих талаар санал нэгджээ. 

Эх сурвалж: Монголын үнэн сонин №030/24609/