Монгол Ардын Намын Удирдах зөвлөлийн ажлын албаны удирдлагууд болон тус намаас сонгогдсон УИХ-ын гишүүд иргэд олон нийт, намын гишүүдтэй уулзаж, тэдний санал хүсэлтийг хүлээн авдаг “Иргэдээ сонсъё” уулзалт үргэлжилж байна.
УИХ-ын гишүүн Х.Баасанжаргал өнөөдрийн /2025.04.01/ “Иргэдээ сонсъё” уулзалтад оролцож, Тусгаар тогтнолын ордны нэгдүгээр давхрын уулзалтын өрөөнд ирсэн иргэдийн төлөөллийн санал хүсэлтийг хүлээн авлаа.
Уулзалтыг зорьж ирсэн Нийслэлийн Хан-Уул дүүргийн 13 дугаар хорооны иргэн Ч.Нямсүрэн сэтгэл судлалын чиглэлээр суралцдаг, мөн хувиараа бизнес эрхэлдэг бөгөөд нийгэмд соён гэгээрүүлэх ажил түлхүү хийх сонирхолтой аж.
Тэрбээр энэ чиглэлээрээ хүүхдүүд болон төрийн албаны анхан шатны байгууллагын ажилтнуудад ёс зүй, харилцаа, хандлагыг дээшлүүлэх сургалт ороход ямар гаргалгаа, дэмжлэг байдгийг УИХ-ын гишүүн Х.Баасанжаргалаас лавлахаар иржээ.
Гишүүн хариулахдаа "Төрийн албаны зөвлөлийн дэргэд Төрийн албаны ёс зүйн хороо гэж байдаг. Тэндээс төрийн албан хаагчдад сургалт зохион байгуулдаг. Албан ёсны ийм систем бол бий. Харин намын ажилтан, гишүүд, дэмжигчдийн хүрээнд, мөн намын дэргэдэх байгууллагуудын зүгээс сайн дурын үнэ төлбөргүй сургалт ордог" гэж тайлбарлав.
Мөн Сүхбаатар дүүргийн наймдугаар хорооны иргэн дахин төлөвлөлтийн талаар хөндсөн бол Чингэлтэй дүүргийн хоёрдугаар хорооны өндөр настан хадгаламж зээлийн хоршоонд мөнгөө алдсанаас хойш 27 жилийн турш түрээсийн байр, байшинд амьдарч байгаагаа учирлаж байлаа. УИХ-ын гишүүн Х.Баасанжаргал Сүхбаатар дүүргээс НИТХ-д сонгогдсон төлөөлөгчдөд дахин төлөвлөлтийн талаар судалж, анхаарал хандуулахыг хүсэх, мөн настай хүнд амьдрах боломжтой газар судалж үзээд хариу өгнө гэдгээ хэллээ.
Эх сурвалж: nam.mn
°C
Сэтгэгдэл (0)
Сэтгэгдэл бичигдээгүй байна