Монголын сагсан бөмбөгийн холбооны ерөнхий нарийн бичгийн дарга С.Төгсжаргал цахим хуудастаа “Монголын сагсан бөмбөгийн түүхэн дэх мэргэжлийн буюу клубийн түвшний олон улсын лигт эсрэг багийн талбайд зочлон тоглосон анхны тоглолт, түүхэн хожил” хэмээн “Бишрэлт Металл” багийг онцоллоо. Сагсан бөмбөгийн дээд лигийн 2023-2024 оны улирлын дэд аварга “Бишрэлт Металл” баг 2025 оны Азийн аваргуудын лигийн хэсгийн эхний тоглолтдоо ялалт байгуулсан нь фанатуудаа огшоосон юм. Тус лигийн “А” хэсэгт багтсан “Бишрэлт Металл” Малайзын Куала Лумпур хотод зочилж, “Маба” спортын ордонд талбайн эзэн “Эн Эс Матрикс Дийрс” багийг 98:86-гаар буулган авав. Энэ тоглолтод Байрон Уэсли 34 оноогоор талбайд гарсан бүх тоглогчийг тэргүүлсэн бол Дэвон Скотт 24, А.Энхбаясгалан 21 оноо авч багийнхаа хожилд хувь нэмэр орууллаа. Тоглолтын үеэр тус багийн ахлагч Т.Ууганбаяр талбайд гараагүй нь бэлтгэлийн үеэр хамартаа авсан гэмтэлтэй нь холбоотой. Мөн Н.Мөнхчөдөр хөлийнхөө бэртлээс шалтгаалж тоглолтод оролцож чадаагүй байна. Манай сагсан бөмбөгчид плей-оффын хасагдах хагас шигшээ шатны эхний тоглолтоо “АПЭС”-ийн эсрэг хийнэ. Харин Азийн аваргуудын лигийн хүрээнд хэсгийн хоёр дахь тоглолтоо ирэх сарын 5-нд Индонезийн Жакарта хотыг зорьж, тус улсын лигийн аварга "Пелита Жаяа" багтай талбайд гарах юм.
Эх сурвалж: Монголын үнэн сонин №012/24639/
°C
Сэтгэгдэл (0)
Сэтгэгдэл бичигдээгүй байна