Монголын жүдо бөхийн холбооноос зохион байгуулдаг “Топ 6” цувралын гурав дахь тэмцээний товыг зарлалаа. “M bank arena”-д ирэх сарын 19-нд болох тэмцээнд оролцуулахаар энэ удаад холын зочдыг урьжээ. Тодруулбал олимп, дэлхийн аварга Ким Жэ Бумаар удирдуулсан БНСУ-ын шигшээ багийн тамирчид Монголд ирэх нь. Жин тус бүрийн шилдгүүдийг тодруулах, дотоодын чансааны оноо олгох, өрсөлдөөнийг нэмэгдүүлэх зорилготой тэмцээний 81 кг-ын жинд Ан Жүн Сун, 90 кг-д Ким Жае Мин, 100 кг-д Жүн Бум Сүк нар авхаалж самбаагаа сорихоор ирэх юм. Түүнчлэн 70 кг-ын жинд Пак Сэ Ун, 78 кг-д Ким Жу Юүн нар татамид гарч барилдахаар болжээ. Монголын жүдо бөхийн холбоо болон БНСУ-ын жүдо бөхийн холбоо хамтран ажилладаг бөгөөд энэ хүрээнд тэмцээний дараа хамтарсан бэлтгэл хийхээр болсон байна. Түүнчэн Монголын жүдо бөхийн холбооны ерөнхийлөгчийн санаачилгаар 21 аймаг, 330 сумыг жүдогоор хичээллэх материаллаг баазаар хангах, бидний ирээдүй болсон хүүхдүүдийг спортод дурлуулах, ирээдүйн эрүүл иргэн бэлдэхээр томоохон төслийг эхлүүлжээ. Төслийг монгол орны хойд цэг болох Хөвсгөл аймгийн Ханх сумаас эхлүүлж буй бөгөөд тэнд дэвжээ болон хүүхдийн жүдоги хүлээлгэн өгсөн байна.
Б.Сэлэнгэ
Эх сурвалж: Монголын үнэн сонин №012/24639/
°C
Сэтгэгдэл (0)
Сэтгэгдэл бичигдээгүй байна