Д.Амарбаясгалан: Засгийн газрын авто баазын автомашины тоог хасаж, төсвөөс санхүүжүүлэхгүй байгууллага болголоо

Засгийн газрын ээлжит хуралдаан боллоо. Хуралдаанаар хэлэлцсэн шийдвэрлэсэн асуудлын талаар ЗГХЭГ-ын дарга Д.Амарбаясгалан мэдээлэл хийв. Тэрбээр: 

-Авто бааз улсын төсөвт үйлдвэрийн газрыг ТӨААТҮГ болгон өөрчлөх асуудлыг Засгийн газрын хуралдаанаар батлууллаа. Уг улсын төсөвт үйлдвэрийн газар нь 164 авто тээврийн хэрэгсэл, 210 орчим ажилтантай, улсын төсвөөс жилд 3-3.2 тэрбум төгрөгийн санхүүжилттэй үйл ажиллагаа явуулдаг байсан. Үүнийг 100 автомашинтай, 105 ажилтантай, төсвөөс санхүүжүүлдэггүй байгууллага болгон өөрчиллөө.

Төрийн хэмнэлтийн хуулийн дагуу тухайн авто бааз нь дуудлагаар үйлчилгээ үзүүлнэ, орон нутгийн томилолтын үйл ажиллагааг бүрэн хариуцаж ажиллах юм. Төрийн хэмнэлтийн хууль үүгээр дуусахгүй. Төрийн нарийн бичгийн даргаас доош албан тушаалтан автомашин хэрэглэхгүй. Зайлшгүй шаардлагатай тохиолдолд сард 100-200 мянган төгрөгийн хязгаартайгаар дуудлагын такси үйлчилгээ ашиглах эрх олгоно.

Нийтдээ 250 автомашиныг хураасан, ойрын хугацаанд 250 автомашины хураан төвлөрүүлнэ. Нийт 509 автомашиныг хураан төвлөрүүлж, эмнэлэг, онцгой, цагдаа, гааль, ХХЕГ зэрэг байгууллагын хэрэгцээнд зориулан тарааж өгнө. Төрийн байгууллагууд авч ашиглах боломжгүй  элэгдэл, хорогдол хэмжээндээ хүрсэн 23 автомашиныг 120 гаруй сая төгрөгөөр үнэлж дуудлага худалдаанд оруулсан. Нийт дуудлага худалдааны дүн 370 орчим сая төгрөгт хүрсэн байна. Орон нутгаас 1000 орчим автомашиныг татан төвлөрүүлж, үзлэг оношилгоо хийнэ хэмээв. 

Н.Нягт