Вьетнамын хойд нутгийг дайрсан “Яги” хар салхины нөлөө арилаагүй байна. Азийн хамгийн хүчтэй хар салхины хурд цагт 203 км/цаг хүрсэн. Хар салхины улмаас хөрсний гулгалт, үерийн улмаас 60 гаруй хүн амь үрэгджээ. Хойд Вьетнамын 1.5 сая орчим иргэн цахилгаан, хэрэглээний усгүй болсон бөгөөд гамшгийн бүсээс оршин суугчдыг нүүлгэн шилжүүлж байна. Сүйдсэн зам, гүүрийг яаралтай сэргээн засварлахыг цэргийнхэнд үүрэг болгосон ч цаг агаарын таагүй нөхцөлд барилгын ажил удааширчээ. Цаг уурчид хөрсний гулгалт үүсэж болзошгүйг анхааруулсан. Гамшгийн үеэр далайд гарсан загасчдыг сураггүй алга болсон гэж мэдээлжээ. “Яги” хар салхи Филиппин, Хятадын өмнөд хэсгийг дайран өнгөрсөн. БНХАУ-ын эрх баригчдын мэдээлснээр Хайнань арлын хэмжээнд 102 сая ам.долларын дэд бүтцийн алдагдалд орж, 57 мянган барилга байшин нурж, цахилгаан, ус тасарчээ. Сингапурын ажиглалтын төвийн захирал Бенжамин Хортон “Далайн усны хэм нэмэгдэхийн хэрээр хар салхи улам хүчтэй болж байна. Салхины хурд нэмэгдэж, хур тунадас ихэссэн” гэжээ. Уур амьсгалын өөрчлөлтөөс болж хар салхины давтамж, хүч нэмэгдэж, удаан хугацаанд үргэлжлэх болсон. Дулаан уур амьсгал чийгийг нэмэгдүүлснээр хүчтэй хур тунадас үүсгэдэг аж.
Эх сурвалж: Монголын үнэн сонин №034/24613/
°C
Сэтгэгдэл (0)
Сэтгэгдэл бичигдээгүй байна