НҮБ хиймэл оюун ухаанд анхаарал хандууллаа

НҮБ-ын Ерөнхий  ассамблейн 79 дүгээр чуулганы дээд түвшний долоо хоног энэ сарын 24-нд эхэлнэ.  Чуулганаар зэвсэгт мөргөлдөөнийг шийдвэрлэх, тогтвортой хөгжлийн зорилтуудыг хэрэгжүүлэх, хөгжиж буй орнуудад тусламж үзүүлэх зэрэг өргөн хүрээний асуудлыг хэлэлцэхээр төлөвлөжээ. Энэ жилийн чуулганыг  Камеруны Ерөнхий сайд асан Филемон Янг албан ёсоор удирдана. Дээд түвшний долоо хоногийн өмнө Ирээдүйн дээд хэмжээний уулзалт энэ сарын 22-23-нд болно. Энэхүү арга хэмжээ нь илүү сайхан одоо цагийг бий болгож, ирээдүй цагийг хайрлан хамгаалах асуудлаар зөвшилцөлд хүрэх зорилготой. Дээд хэмжээний уулзалтаар “Ирээдүйн төлөөх пакт”, “Дэлхийн дижитал гэрээ”, “Хойч үед зориулсан тунхаг” зэрэг гурван баримт бичгийг зөвшилцөх юм.  Дээд түвшний долоо хоногийн үеэр Бразилын Ерөнхийлөгч Лула да Силва, АНУ-ын Ерөнхийлөгч Жо Байден, Их Британийн Ерөнхий сайд Кир Стармер, Францын Ерөнхийлөгч Эммануэль Макрон, Украины Ерөнхийлөгч В.Зеленський нар үг хэлнэ. Энэ удаагийн чуулганы гол онцлог нь хэлэлцэх асуудлын жагсаалтад хиймэл оюун ухаан багтжээ. НҮБ-ын түүхэнд анх удаа энэ асуудал анхаарлын төвд орж байгаа нь хиймэл оюун ухааны хурдацтай хөгжил, түүний дэлхийн аюулгүй байдал, эдийн засагт үзүүлэх нөлөөтэй холбоотой асуудал дэлхийн хамтын нийгэмлэгийг улам бүр түгшээж буйг илтгэж байна. Энэхүү чуулганы хүрээнд тусгай ажлын хэсэг байгуулахаар төлөвлөж байна. Тус ажлын хэсэг нь хиймэл оюун ухааныг хэрэглэх ерөнхий зарчим, нэгдсэн стандартыг боловсруулах үүрэг хүлээх юм.

Эх сурвалж: Монголын үнэн сонин №035/24614/