Чингэлтэй дүүрэг “Дулаалъя” аяныг эхлүүллээ

Нийслэлийн Чингэлтэй дүүрэг агаарын бохирдлыг бууруулах, айл өрхүүдийн цахилгаан, түлшний зардлыг хэмнэх зорилгоор гэр хорооллын бүсийн байшингуудын дулаан алдагдлыг гадна болон дотор талаас нь хэмжиж эхэллээ. Чингэлтэй дүүргийн Засаг дарга Н.Мандуулын санаачлан хэрэгжүүлж байгаа “Дулаалъя” аяны хүрээнд түүврийн аргаар сонгосон айл өрхүүдийн байшингийн дулаан алдагдлыг инженер, мэргэжилтнүүдтэй хамтран тусгай төхөөрөмжөөр нарийн хэмжиж, тухайн барилгад хаана нь ямар асуудал байна вэ гэдэг дата судалгааг цуглуулах юм. Эдгээр дата мэдээллээ нэгтгэснээр айлуудад дараагийн өвөлдөө бэлтгэлтэй орох, тэдэнд гэр, байшингаа дулаалах сэдлийг бий болгох, энэ чиглэлийн мэргэжлийн хүмүүсийн мэдлэг зөвлөгөөг айл өрх бүрд хүргэх боломжийг бүрдүүлж өгнө. Өөрөөр хэлбэл, айл өрхүүдэд дулаан алдагдалтай байшингаа хэрхэн зөв, үр дүнтэй, хямд зардлаар дулаалах тал дээр зөвлөгөө, мэдээлэл хүргэж ажиллах юм. Гэр хорооллын бүсийн айл өрхүүд дулаан алдалтаа бүрэн шийдэж чадвал түлш, цахилгааны зардлаа байшингийнхаа онцлогоос хамаараад 40-65 хувь бууруулна гэх тооцоог мэргэжилтнүүд гаргаад байна. Ингэснээр агаарын бохирдол ч тодорхой хэмжээнд буурах үр дүнтэй юм.

Айл өрхүүдийн дулаан алдагдлыг хэмжиж эхлэв
Нийслэл, Эрчим хүчний яамны зүгээс дулааны эх үүсвэрүүдийг нэмэгдүүлэх, сайжруулсан шахмал түлш, нүүрснээс гадна газ, сэргээгдэх эрчим хүчний шийдлүүдийг судалж, "Яндангүй бүс" зэрэг санаачилгуудыг төлөвлөж байна. Эдгээр ажил газар дээрээ үр дүнтэй болж, утаа бууран, хамгийн гол нь өрхийн хэрэглээний зардлыг багасгахын тулд айл өрхүүд байшин, гэрээ хэрхэн дулаалах талаар мэдлэг, мэдээлэлтэй байх нь чухал юм.  Энэ талаар Чингэлтэй дүүргийн Засаг дарга Н.Мандуул “Олон улсын болон төрийн бус байгууллагуудын хийсэн олон төрлийн судалгаа байгаа ч тэдгээрийг бодит практик дээр буулгаж, амьдралд хэрэгжих нөхцөлийг бий болгохын тулд Чингэлтэй дүүрэг "Дулаалъя" аян зохион байгуулж байна” гэлээ.
Дулааны хэмжилт хийсний дараа хэрхэх вэ
Дулаан алдагдлын хэмжилт хийсэн айлуудын нарийн дата, тайлан эхнээсээ гарч эхэлжээ. Ийнхүү нэг хэсэг газрын айл өрхүүдээ хэмжиж гаргасан дулаан алдагдлын нэгдсэн мэдээллээ ашиглаад инженер, мэргэжилтнүүдтэй хамтран ямар төрлийн байшинг "Хэрхэн дулаалах вэ" гэдэг дээр нь зөвлөгөө, мэдээлэл бэлтгэж дүүргийн хороо, хэсэг, айл өрх бүрд хүргэж ажиллахаар төлөвлөсөн байна. Иргэдийг байшин дулаалгын мэдлэг, мэдээллээр хангах нь чухал гэдгийг энэ чиглэлийн багш, мэргэжилтэн, инженерүүд хэлж байна. Харин үр дүнтэй, хямд зардлаар хэрхэн дулаалах, ямар материал ашиглах боломж байна вэ гэдэг тал дээр Чингэлтэй дүүргийн ажлын хэсэг ШУТИС-ийн харьяа Барилгын эрчим хүч хэмнэлтийн төв, Монголын ШУА-ийн Физик, технологийн хүрээлэн, “Дулаан шийдэл” ТББ зэрэг байгууллагуудтай уулзалт хийж, туршлага судалж байгаа юм байна.

 Х.Цацрал

 Эх сурвалж: Монголын үнэн сонин №005/24632/