Мэндчилгээ

Элэг нэгт ахан дүүс, эрхэм хүндэт монголчууд аа,

Итгэл зүтгэлээр нэгдсэн Монгол Ардын Намын гишүүд, дэмжигчид ээ,

Та бүхэндээ XVII жарны “Хилэнт эх” хэмээх луу жилээ үдэж, “Элдэв эрдэнэт” хэмээх Хөхөгчин модон могой жилээ угтаж буй Хаврын тэргүүн сарын билигт сайн өдрийн мэндчилгээг өргөн дэвшүүлье. Өлзийт жилийн ерөөл билиг хэлэлцэн,өвөг дээдсээ хүндэтгэн золгож, сар шинэдээ сайхан шинэлж байна уу.

Улиран одож буй луу жил монголчууд бидэнд үр өгөөж, хишиг буянаа хайрласан, бороо хуртай, арвин ургацтай, өнтэй өвөлтэй өргөн дэлгэр сайхан жил болж өнгөрлөө.

Монголчууд бид Үндсэн хуулиар олгогдсон сонгох, сонгогдох эрхээ эдэлж, Улсын Их Хурлын болон орон нутгийн ИТХ-ын төлөөлөгчдөө сонгох сонгуулиа амжилттай зохион байгууллаа. Эдүгээ 104 жилийн түүхтэй улс төрийн ууган хүчин Монгол Ардын Намд итгэн саналаа өгч, биднийг дэмжсэн иргэд сонгогчид намынхаа нийт гишүүд, дэмжигчид та бүхэндээ гүн талархал илэрхийлье. Монгол Ардын Нам Улсын Их хурлын 2024 оны сонгуульд оролцсон “Шинэ сэргэлтийн бодлого-Бүсчилсэн хөгжлийн реформ” мөрийн хөтөлбөрөө бүрэн хэрэгжүүлэхийн төлөө Монгол Улсын Ерөнхийлөгч, УИХ-ын дэмжлэгийг авч, Засгийн газрын түвшинд нягт хамтран ажиллаж байгаа төдийгүй ард иргэд, баялаг бүтээгч, бизнес эрхлэгчдийн оролцоо, хамтын ажиллагааг чухалчлан бодит үр дүн гаргахын төлөө хичээн ажиллаж байна.

МАН санаачлан  “МАН-ын хөгжлийн стратеги - Agenda 2.0” хөтөлбөр, “Бүтээмжийн гурван шилжилт” үндэсний хөгжлийн стратегийг боловсруулж, ирж буй могой жилд энэхүү хөтөлбөрийг гишүүд дэмжигчид та бүхэндээ танилцуулан хэлэлцүүлж, МАН-ын 31 дүгээр их хурлаар хэлэлцэн батлахаар төлөвлөж байна. Энэ нь намын төдийгүй улс орны хөгжлийн ойрын, дунд хугацааны замын зураглал байх болно.

Улиран одож буй луу жилийн нэгэн амжилт бол УИХ-аар Үндэсний баялгийн сангийн хууль баталж, Монголчууд бид “Баялагтаа эзэн Монгол” байх эрх зүйн үндэс бүрэн бий болж, "Чингис сан" хэмээх Үндэсний баялгийн сангаас Монгол хүн бүр баялгийн үр өгөөжийг хүртэх боломж бүрдсэн явдал юм.

Баялгийн зөв хуваарилалт монголчууд бидний хөгжлийн шинэ гараа, үндэсний сэргэн мандлын түүчээ билээ. Дэлхий нийтийн амаргүй энэ цаг үед Монголчууд бид нэг нэгэндээ хүндэтгэлтэй эв эеэ сахиж, хөгжил дэвшлийн төлөө хамтарч хоршин хөдөлмөрлөж, эрдэм мэдлэг, өв соёл, өвөг дээдсээ дээдлэн эх сайхан Монгол орныхоо төлөө хамтдаа зүтгэцгээе.

Уудам Эх орныхоо өнцөг булан бүрд болон хилийн чанадад ажиллаж, амьдран суугаа ахмад буурлууд, ахан дүүс, нийт ард иргэддээ угтан золгож буй “Элдэв эрдэнэт” хэмээх могой  жилдээ элбэг хангалуун, итгэл дүүрэн, цог хийморь өөдөө байхын өлзийт ерөөлийг өргөн дэвшүүлье.

Сар шинэдээ сайхан шинэлээрэй.

Монгол Ардын Намын Ерөнхий нарийн бичгийн дарга Я.СОДБААТАР