Мэндчилгээ

Эрхэм Монголчууд, Эрхэм журмын нөхөд Та бүхэндээ XVII жарны “Элдэв эрдэнэт” хэмээх Хөхөгчин модон могой жилийн Сар шинийн мэнд, улс төрийн ууган хүчин Монгол Ардын Нам байгуулагдсаны түүхт 104 жилийн ой, Эх орончдын өдрийн мэндийг өргөн дэвшүүлье.

Энэ жил Монголын уламжлалт Сар шинийн баяр, Монгол Ардын Намын баяр, Эх орончдын өдөр давхцаж, төрт ёсны мянга, мянган жилийн түүхтэй үндэсний өв соёлоороо бахархахын зэрэгцээ тусгаар тогтнолоо сэргээсэн цогт эх орончдын түүхэн үйл хэргийг хүндэтгэх онцгой учрал тохиож байна.

Эх орончдын өдөр Монгол Улсын тусгаар тогтнол, эрх чөлөө, хөгжил дэвшил, соён гэгээрлийн төлөө амь нас, ариун үйлсээ зориулсан үе, үеийн эх орончдын үзэл санаа, үйл хэргийг эгнэгт санаж, энэ цагт эрхэмлэн үргэлжлүүлж, ирээдүй хойчдоо залгамжлуулах чухал өдөр байсаар ирсэн, цаашид ч байх болно.

Улиран одож буй Хөх луу жилд дэлхийн 70 гаруй улсад сонгууль болж, нийт хүн төрөлхтний 50 орчим хувь нь улс төрийн сонголтоо хийлээ. Монгол Улсад ч мөн Улсын Их Хурлын болон орон нутгийн өөрөө удирдах байгууллагын ээлжит сонгууль болж, ардчилсан тогтолцоотой улсуудаас эрх баригч нам 50 хувиас дээш суудал авсан цорын ганц тохиолдол боллоо.

Монгол Улсын Үндсэн хуулийн өөрчлөлтийн дагуу сонгуулийн холимог тогтолцоог нэвтрүүлж, сонгогчдын саналыг гээхгүй байх зарчмыг баримтлан хурдтай хөгжлийн төлөө зориг гарган Хамтарсан Засгийн газар байгуулж, засаглалын тогтвортой байдлыг хангах, улс төрийн шинэ соёл төлөвшүүлэх эхлэлийг тавилаа.

Монгол Улсын Засгийн газраас “Алсын хараа-2050”, урт хугацааны хөгжлийн бодлого, Засгийн газрын 2024-2028 оны үйл ажиллагааны хөтөлбөрт туссан хөгжлийн 14 мега төсөл, 14 реформыг хэрэгжүүлэхээр зарласан билээ.

Энэ хүрээнд

Монгол-Хятадын хоёр дахь төмөр замын гарц Гашуунсухайт-Ганцмод боомтын хил холболтын төмөр замын төслийг хэрэгжүүлэх Засгийн газар хоорондын хэлэлцээрт гарын үсэг зурлаа. 

1997 онд анхны хайгуулын судалгаа нь эхэлж байсан Монгол-Францын хамтарсан ураны төслийг Улсын Их Хуралд хэлэлцүүлж, Засгийн газарт эрх олгосны дагуу хөрөнгө оруулалтын гэрээг байгууллаа.

1964 оноос судалгааг эхлүүлж байсан Эрдэнэбүрэнгийн 90 МВт-ын усан цахилгаан станцын бүтээн байгуулалтыг эхлүүлэхэд бэлэн боллоо.

Эрчим хүчний үнэ чөлөөлж, хувийн хэвшлийн гацсан төслүүд хэрэгжих суурь нөхцөл бүрдэж байна.

Үндэсний баялгийн сангийн тухай хууль батлагдан хэрэгжиж, стратегийн ордуудын 34 хувьд ногдох ногдол ашгийг Иргэдийн хуримтлалын дансанд төвлөрүүлж эхэллээ.

Дулааны гуравдугаар цахилгаан станцыг 300МВт-аар өргөтгөн, шинэчлэх төслийн зураг төсөл боловсруулах ажлыг эхлүүллээ.

Засгийн газраас 2025 оныг “Нийслэлийн дэд бүтцийн хөгжлийг дэмжих жил” болгон зарлаж, Улаанбаатар хотыг 2040 он хүртэл хөгжүүлэх ерөнхий төлөвлөгөөг боловсруулан Улсын Их Хуралд өргөн барьж, нийслэлийн хөгжлийн 24 төсөл хэрэгжүүлэхээр төлөвлөв.

2024 оны урьдчилсан гүйцэтгэлээр эдийн засгийн өсөлт 4.9 хувь, дотоодын нийт бүтээгдэхүүн 80.0 их наяд төгрөг, нэг хүнд ногдох дотоодын нийт бүтээгдэхүүн 6.890 ам.доллар болж, нүүрсний экспорт 83.6 сая тоннд хүрч, түүхэн дээд амжилт тогтоосон нь бидний амжилтыг бататгаж байна.

Айлчлан ирж буй эрдэнэсийг сахин хамгаалах, эд баялаг, үр шимийг тэтгэж буйг илэрхийлсэн, үржин дэлгэрэхийг бэлгэдсэн “Элдэв эрдэнэт” хэмээх модон могой жилд Монгол орон даяар хөгжлийн төслүүдийн их бүтээн байгуулалтыг өрнүүлэх, Үндэсний баялгийн сангийн орлого арвижиж, иргэдийн хуримтлалын санд нэмэгдэх жил байна гэдэгт итгэж байна.

Монгол Ардын Нам XXXI ээлжит их хурлаа хийж, намын дүрмээ шинэчлэхээс гадна орчин үеийн улс төрийн намын хөгжилд нийцүүлсэн AGENDA 2.0 хөтөлбөрийг батлан хэрэгжүүлж эхлэх болно.

 Та бүхэн Сар шинэдээ сайхан шинэлээрэй!

Монгол Улсын Ерөнхий сайд, Монгол Ардын Намын дарга Лувсаннамсрайн ОЮУН-ЭРДЭНЭ