Жюүрёод Оошёома П.Дэлгэрбаяр, макүшитад Тамашёохо Э.Энхманлай манлайллаа

Б.Зул

Японы мэргэжлийн сүмо бөхийн 2022 оны сүүлчийн тэмцээн болох Кюүшюү башё өндөрлөлөө.  Тэмцээн тун өрсөлдөөнтэй өрнөсөн. Башёгийн эхний 11 өдрийн байдлаар Хоошёорюү С.Бямбасүрэн тэргүүлж байсан ч гурав дараалан унаад анхны түрүүгээ хүртэх боломжоо алдав. Сүүлийн өдөр маэгашира Такаясү 11 даваатай тэргүүлж, озэки Такакэйшёо, маэгашира Аби нар 10 даваатай нэхэж явлаа. Такаясү нэг давахад л түрүүлнэ. Гэвч тэр Абид унаж, Такакэйшёо давснаар гурван бөхийн даваа тэнцэж, хоорондоо дахин барилдахаар болсон. Сугалаа сугалахад эхлээд Аби Такаясүтай барилдлаа. Аби золголт дээр зайлж, Такаясү уналаа. Унаад зогсохгүй гэмтэж, дохёг орхисон. Аби озэки Такакэйшёог ч унагааснаар анх удаа түрүү бөхөд олгодог эзэн хааны цом өргөх нь тэр. Тэрээр долдугаар сард тохой, өвдгөндөө мэс засал хийлгэн, Намрын тэмцээнийг өнжсөн. Эргэж ирээд л шууд Эзэн хааны цомыг өргөсөн нь энэ. Озэки Шёодай цолоо алдаж, ирэх тэмцээнд сэкивакэ цолтой барилдана. Монгол бөхчүүдийн хувьд жюүрёод  Оошёома П.Дэлгэрбаяр, макүшитад Э.Энхманлай түрүүлсэн амжилттай.

Арваннэгдүгээр сарын тэмцээний тусгай шагналтнууд

Шүкүншёо-Гарамгай барилдааны шагнал: Маэгашира 1-Такаясү 12:3

Кантошёо-Дайчин барилдааны шагнал: Маэгашира 9-Аби 12:3

Гиношёо-Уран барилдааны шагнал: Сэкивакэ Хоошёорюү С.Бямбасүрэн 11:4

Монгол бөхчүүд

Ёкозүна Тэрүнофүжи - гэмтэл

Сэкивакэ Хоошёорюү  11:4

Комүсүби Тамаваши 6:9

Комүсүби Кирибаяма 8:7

М-2 Ичиножёо 4:11

М-10 Чиёошёома 7:8

М-14 Азүмарюү 7:8

Жюүрёо

Б-3 Миторюү Б.Төрболд 9:6

З-6 Хокүсэйхо Э.Даваанинж 10:5

Б-9 Дайшёохо Ч.Шижирбаяр 8:7

Б-12 Оошёоүма П.Дэлгэрбаяр 11:4

Макүшита

З-9 Дэванорюү Т.Тэмүүлэн 4:3

З-12 Хокүтэнкай Г.Сүхбат 2:5

З-23 Тамашёохо Э.Энхманлай 7:0

Б-39 Хокүтомарү Н.Чинзориг 5:2

З-45 Араүма Б.Төртогтох 4:3

Санданмэ

Б-2 Токисоүма Б.Анхбаяр 3:4

Б-7 Саданохикари Д.Наранцогт 5:2

Б-21Котокэнрюү Г.Билгүүн 3:4