АНУ-ын технологийн аварга “Майкрософт” компанийн салбар “ZeniMax” студийн ажилчид Үйлдвэрчний эвлэл байгуулах хүсэлт гаргасныг удирдлагууд хүлээн зөвшөөрчээ. “Майкрософт” компанийн хэвлэлийн төлөөлөгч “Корпорацийн соёл, үйлчлүүлэгчдэдээ үйлчлэх чанарыг бэхжүүлж салбартаа үлгэр дуурайлал боллоо. Цалин хөлс, хөдөлмөрийн нөхцөл зэрэг асуудлаар хамтын хэлэлцээр хийх боломжийг олгодог Үйлдвэрчний эвлэл нь ажлын байрыг сайжруулж, шударга бус цалин хөлс, хямралын үед хэт ачааллыг бууруулна” гэж мэдэгдсэн байна. Уг Үйлдвэрчний эвлэл нь Мэрилэнд, Техас дахь салбарт хөдөлмөр эрхэлдэг 300 орчим ажилчдыг төлөөлөх аж.
“ZeniMax” студи видео тоглоомын үйлдвэрлэл эрхэлдэг бөгөөд “The Elder Scrolls”, “Fallout” зэрэг алдартай тоглоомын эрхийг эзэмшдэг. Амьжиргааны өртөг нэмэгдэж байгаа энэ үед хөдөлмөр эрхлэгчид ажил олгогчдоос илүү ихийг шаардах болсон. Энэ мэт хөдөлмөрийн тэмцэл АНУ-д өнгөрсөн жилээс эрчимжсэн юм. Тухайлбал, “Apple”, “Amazon”, “Google” компанийн ажилчид Үйлдвэрчний эвлэлтэй болох санал гаргаж эхэлжээ. Эдгээр хүсэлтийг корпорацийн удирдлагууд хэлэлцэхээс зайлсхийдэг.
Х.ЗАЯА
°C