Мэргэжлийн сүмогийн 69 дэх ёкозүна, Монгол Улсын Хөдөлмөрийн баатар, гавьяат тамирчин Хакүхо М.Даваажаргалын зодог тайлах ёслол өнгөрсөн бямба гарагт болсон. Токиогийн “Рёогокү Кокүгикан” ордонд болсон ёслолд Монголын улстөрчид, урлаг, спортын төлөөлөл, бизнесийн салбарынхан оролцсон байна.
Мөн Япон улсын Ерөнхий сайд асан Ёширо Мори, “Тоёота Мотор” Корпорацийн Ерөнхийлөгч Акио Тоёода, ёкозүна Кисеносато нар оролцжээ. Хакүхо "Биеийнхээ нэг хэсгийг алдсан мэт мэдрэмж төрж байна" гэж нулимс дуслуулан ярьсан байна. Тэрбээр Японы үндэсний спортод 45 удаа дээд амжилт тогтоож, өрсөлдөгчдөө 1187 удаа ялжээ. Хакүхо өнгөрсөн оны долдугаар сард “Миягино” дэвжээг өвлөн авсан юм.
Тогтмол өндөр амжилт үзүүлж, монгол хүний бяр хүч, ур ухааныг олон улсад таниулахад оруулсан хувь нэмрийг Монгол Улсын Засгийн газар өндрөөр үнэлсэн. Монгол Улсын Ерөнхий сайдын нэрэмжит цомыг Олимп, нийтийн биеийн тамир, спортын сайд Б.Бат-Эрдэнэ гардуулжээ.
Хакүхо М.Даваажаргал сүмо бөхийн хувиар дэвжээнд гарч залуу болон өсвөрийн сүмочидтой хүндэтгэлийн барилдаан хийж, сүмо сонирхогчдоо баярлуулсан билээ. Залуу сүмочдыг төлөөлж хүүтэйгээ, Монгол Улсын Далай аварга Г.Өсөхбаярын хүүтэй сүүлчийн барилдаанаа хийхэд танхимд дүүрэн цугларсан үзэгчид баяр хүргэн хүндэтгэл үзүүлжээ.