Барилга хот байгуулалтын сайдын тушаалаар байгуулсан Улсын комисс Тавантолгой-Гашуунсухайт чиглэлийн төмөр замд ажиллаж, урьдчилсан шатны техникийн комиссын өгсөн үүрэг даалгаврыг хангасан хэмээн үзэж Улсын комиссын гишүүдийн саналаар ашиглалтад оруулжээ. Ингэснээр манай улс анхны нэгдүгээр зэрэглэлийн, уулзваргүй, хүнд даацын, жилд 30-50 сая тонн ачаа тээвэрлэх хүчин чадалтай, 233.6 км төмөр зам болон ачилтын тойрог замтай болж байна.
Монгол Улсын төр, засгаас хилийн бүх боомтоо авто замаар, стратегийн боомтуудаа төмөр замаар холбож, агаарын тээврийн либеральчлалыг хийх томоохон зорилт тавьж, үүнийг УИХ-аас баталсан “Шинэ сэргэлтийн бодлого”-д тусгаад буй. Улмаар Монгол Улсын Засгийн газар, БНХАУ-ын Засгийн газартай Гашуунсухайт-Ганц мод, Шивээхүрэн-Сэхэ, Бичигт-Зүүнхатавч зэрэг хоёр орны хилийн боомтын төмөр замын хилийн шугам дайран өнгөрөх цэгийг өнгөрсөн оны хоёрдугаар сард эцэслэн тохиролцсон юм. Энэхүү зөвшилцлийн хүрээнд өнгөрсөн оны гуравдугаар сарын 11-нд Зүүнбаян-Ханги чиглэлийн 226 км төмөр замын бүтээн байгуулалтын ажил эхэлж, найман сарын дотор барьж дуусган ашиглалтад оруулсан.
Мөн оны гуравдугаар сард Тавантолгой-Зүүнбаян чиглэлийн 416 км төмөр замын ажлыг дуусгаж, зүгшрүүлэх тээвэрлэлт эхлүүлсэн бол Тавантолгой-Гашуунсухайт чиглэлийн 267 км төмөр замыг есдүгээр сард ашиглалтад оруулж, хил холболтын ачиж буулгах байгууламжийн зураг төсвийг хийсэн юм. Түүнчлэн өнгөрсөн оны долдугаар сарын 2-нд алс дорнодын Хятадын тэнгист гарах хамгийн дөт зам болох зүүн босоо чиглэлийн Бичигт-Зүүнхатавч төмөр замын төслийн ажлыг эхлүүлж, баруун босоо тэнхлэгийн Шивээхүрэн-Нарийнсухайт-Арцсуурь чиглэлийн төмөр замын их бүтээн байгуулалтын түүхэн эхлэлийг тавиад байгаа билээ.
С.Аз
Эх сурвалж: Монголын үнэн сонин №021/24552/
°C
Сэтгэгдэл (0)
Сэтгэгдэл бичигдээгүй байна