Ц.Мөнхзул дэлхийн аварга боллоо

Б.Зул

Египетийн Каир хотноо буудлагын дэлхийн аварга шалгаруулах тэмцээн өндөрлөж байна. Дөрвөн жил тутамд болдог тус тэмцээнд Монголын мэргэн буучид өргөн бүрэлдэхүүнтэй оролцож, өндөр амжилт үзүүлэв. 50 метрийн сонгомол гар бууны холимог багийн дасгалд Э.Даваахүү, Ц.Мөнхзул нар мөнгөн медаль хүртсэн тухай бид мэдээлсэн. Тэгвэл өчигдөр олон улсын хэмжээний мастер Ц.Мөнхзул, Т.Баярцэцэг, Э.Хишигдэлгэр нар медалийн тавцанг эзэгнэлээ. 

Тодруулбал, ДАШТ-ий хөтөлбөрт шинээр багтсан том калибрын гар бууны 25 метрийн дасгалд есөн тамирчин цэц мэргэнээ сорьсноос олон улсын хэмжээний мастер Ц.Мөнхзул 585 оноогоор (293+292) алтан медаль хүртэж, Каирт төрийн дууллаа эгшиглүүлэв. Тэрбээр буудлагын спортоор алтан медаль хүртсэн Монголын хоёр дахь мэргэн бууч болж байгаа юм. 

Тэгвэл олон улсын хэмжээний мастер Т.Баярцэцэг 564 оноогоор (277+287) мөнгөн медалийн эзэн болов. Түүний хувьд эхний шатанд зургаад жагсаж байсан ч түргэн буудлагаа сайн буудсанаар дэд байр руу дэвшиж чадсан юм. Түүнчлэн олон улсын хэмжээний мастер Э.Хишигдэлгэр 557 оноогоор (286+271) хүрэл медаль хүртсэнээр манай гурван тамирчин уг дасгалын бүх медалийг хамлаа. Монголын мэргэн буучид дэлхийн аваргын сүүлийн өдрүүдэд амжилттай буудсанаар нэг алт, хоёр мөнгө, гурван хүрэл медальтай болов.