МАН-ын Бага хурлын гишүүдийн сургалт үргэлжилж байна

С.АЗ 

МАН-ын Бага хурлын гишүүдийн сургалт үргэлжилж байна. Сургалт энэ сарын 6-нд эхэлсэн бөгөөд нээлтэд МАН-ын Нарийн бичгийн дарга Н.Энхбаатар оролцож, намын бодлого, шийдвэрийг танилцуулсан юм. Мөн УИХ, Засгийн газраас хийж хэрэгжүүлж буй томоохон төсөл хөтөлбөр, хууль эрх зүйн шинэчлэлийн талаар мэдээлэл өгсөн. Харин дараагийн өдрийн сургалтад МАН-ын Хяналтын ерөнхий хорооны дарга Б.Баярбаатар оролцож, намын гишүүдийн ёс зүй, сахилга хариуцлагатай холбоотой мэдээлэл өгчээ. Түүнчлэн өчигдрийн сургалтаар МАН-ын Хэвлэл мэдээллийн газрын дарга Г.Баярхүү  мэдээлэл хүргэсэн байна. 
Монгол Улсын нийт хүн амын 51 хувийг эмэгтэйчүүд эзэлдэг ч тэдний төлөөлөл  шийдвэр гаргах түвшинд 20 хувьтай байгаа тул эмэгтэйчүүдийн манлайллыг дэмжиж, оролцоог нэмэгдүүлэх зорилгоор МАН, Социал демократ Монголын эмэгтэйчүүдийн холбоо, НҮБ-ын Хөгжлийн хөтөлбөр хамтран “Манлайлагч-350” хөтөлбөрийг нэг жилийн хугацаатай хэрэгжүүлж байна.  Хөтөлбөрт 21 аймаг, есөн дүүргийн манлайлагч 350 эмэгтэйг хамруулах бөгөөд энэ хүрээнд өнгөрсөн дөрөвдүгээр сард эмэгтэйчүүдийн ёс зүйн манлайлал, жендэрийн үндсэн ойлголт, хүний эрх, социал демократ үзэл санаа, эв санааны нэгдэл, шийдвэр гаргаж, бодлого боловсруулах түвшинд ажиллах эмэгтэйчүүдийн онцлог гэсэн сэдвийн хүрээнд сургалт зохион байгуулсан юм.