Л.Энх-Амгалан: Банкны барьцаанд байгаа объектуудыг сургуулийн зориулалтаар ашиглана

Засгийн газрын ээлжит хуралдаан боллоо. Хуралдаанаар хэлэлцэн шийдвэрлэсэн асуудлын талаар салбарын сайд нар мэдээлэл хийв.  БШУ-ны сайд Л.Энх-Амгалан:

Нийслэлд гурван ээлжээр суралцах эрсдэл үүсээд буй нөхцөл байдалд дунд болон урт хугацааны шийдлийг хэлэлцлээ. 2022-2023 оны хичээлийн жилд 859 сургуульд 746 мянган сурагч суралцсан. Үүнээс улсын хэмжээнд 6 сургуульд 3 ээлжээр 1451 гаруй сурагч хичээллэсэн. Одоо шинээр баригдаж буй 18 барилга удааширсан сургуулийн 11310 гаруй хүүхэд 20 түрээсийн байранд суралцаж байна.

Жил бүр 70 мянга гаруй 6 настан шинээр элсэн ороход 12-р ангийн 35 мянган хүүхэд төгсдөг ба хүүхдийн тоо, ачаалал 35 мянгаар нэмэгддэг тул гурван ээлжид орох эрсдэл үүсдэг. Жилд шинээр 20 сургууль ашиглалтад ороход шинэ хүүхдүүдийн 40 хувийг л хангахаар байгаа юм. 2023-2024 оны хичээлийн жилд Нийслэлд өндөр ачаалалтай 47 сургуулийн 33314 сурагч, 17 аймгийн 34 сургуульд  4379 сурагч гурван ээлжээр хичээллэх эрсдэл үүссэн тул зургаан шийдлийг гаргалаа.

1. Сургуулиудад шинээр өргөтгөл хийх, барилгын ажлыг эрчимжүүлэх
2. Банкны барьцаанд байгаа хураагдсан барилга, объектуудыг сургуулийн зориулалттай ашиглах
3. Хамран сургах тойргийг шинэчлэх, нэг ангид 45-аас дээшгүй сурагчтай байх
4. Их дээд сургуулиудын харьяаны ахлах сургуулийн бүтцийг өөрчлөх
5. Боловсролын салбарт цахим платформыг ашиглана
6. Ирэх жил нэмж 200 туслах багш, нийт 424 багшийг ажиллуулна.

2023-2026 онд 400 орчим тэрбум төгрөгийн санхүүжилтийг шийдэж чадвал гурван ээлжээр хичээллэхгүй байх нөхцөлийг бүрдүүлнэ хэмээн мэдээлэв.