Польш улсад биатлоны Европын залуучуудын аварга шалгаруулах тэмцээн боллоо. Манай тамирчдаас Монгол Улсын биатлоны шигшээ багийн тамирчин, Зэвсэгт хүчний 326 дугаар ангийн гэрээт цэргийн алба хаагч, үндэсний шигшээ багийн тамирчин Э.Энхсайхан алтан медаль хүртэж, төрийн дууллаа эгшиглүүлэв. Тэрбээр буудлагаа 100 хувь гүйцэтгэж гарааныхаа тамирчдаа тэргүүлэх боломжтой болжээ. Өдгөө 21 настай Э.Энхсайхан 15 км-ын зайг 44.34:8 минутын хугацаанд туулсан бөгөөд гүйцэтгэлээ төгс хийж Европын багш дасгалжуулагчдыг алмайруулсан байна. Энэ нь түүний багш, дасгалжуулагч А.Поповтой холбоотой. Дэлхийн шилдэг тамирчдын нэг байсан тэрбээр өдгөө өөрийн залгамж үеэ бэлдэж байна. Э.Энхсайханы хувьд багштайгаа газар орны нөхцөлд дасах сургуулилалт хийж, эх орондоо шигшээ багийн дасгалжуулагчдынхаа удирдлагад тэмцээнийхээ бэлтгэлийг базааж байгаа юм. Тэрбээр мөн эрэгтэйчүүдийн 10 км-ын спринт уралдаанд оролцож нэг сум алдаж 22 дугаар байрт орсон байна. Энэ төрөлд хурд хүчээ сорьсон Монголын тамирчдаас спортын мастер Ж.Гантулга гурван сум алдаж 63 дугаар байр, Б.Сүхбат хоёр сум алдаж 78 дугаар байр, Б.Тэмүүжин дөрвөн сум алдаж 107 дугаар байр, эмэгтэй 7.5 км-ын уралдаанд Х.Эрдэнэтунгалаг 85 дугаар байр тус тус эзэлсэн байна. Олон улсын хэмжээний мастер Э.Энхсайхан онооны нийлбэр дүн буюу 179 оноогоор 12-т эрэмбэлэгджээ. Тэмцээний дараа тэрбээр “2026 оны өвлийн олимпод оролцох нь миний гол зорилго. Тиймээс 2024, 2025 он миний хувьд хамгийн хичээх ёстой жил” хэмээн хэлжээ.
Ийнхүү Польш улсад болсон биатлоны Европын залуучуудын аварга шалгаруулах тэмцээн манай улсын баг тамирчдын хувьд 40 улсын багаас багийн дүнгээр 1181 оноогоор 16 дугаар байрт бичигдэж байна. Одоо тэднийг энэ сарын 23-наас ирэх сарын 2-ны хооронд Эстони улсад болох залуучуудын дэлхийн аварга шалгаруулах тэмцээн хүлээж байгаа юм.
Б.Сийлэн
Эх сурвалж: Монголын үнэн сонин №006/24585/
°C
Сэтгэгдэл (0)
Сэтгэгдэл бичигдээгүй байна