Япон улс Үндсэн хуулийн нэмэлт өөрчлөлтөө түргэтгэлээ

Японы Ерөнхий сайд Фүмио Кишида Үндсэн хуулийн нэмэлт, өөрчлөлтийн хэлэлцүүлгийг түргэтгэхийг үүрэг болгожээ.  Хуулийн дагуу Үндсэн хуульд нэмэлт, өөрчлөлт оруулахын тулд парламентын гишүүдийн гуравны хоёрын санал авах шаардлагатай. Өөрийгөө хамгаалах хүчний тухай заалт, онц байдлын тухай заалтыг Үндсэн хуульд ард түмний зөвшилцлөөр тусгах нь чухал болохыг Фүмио Кишида тодотгожээ. Либерал ардчилсан нам Үндсэн хуулийн есдүгээр зүйлд Өөрийгөө хамгаалах хүчин байх тухай нэмэлт өөрчлөлтийг  дэмжсэн. Дэлхийн хоёрдугаар дайны дараа 1947 онд баталсан Үндсэн хуульд Япон улс дайнаас татгалзаж, гаднын халдлагад зөвхөн батлан хамгаалах зорилгоор хүч хэрэглэх боломжийг тусгасан байдаг тул зэвсэгт хүчнийг Өөрийгөө хамгаалах хүчин гэж нэрлэдэг. Нэмэлт өөрчлөлтийг эсэргүүцэгчдийн үзэж байгаагаар энэ нь Үндсэн хуулийн энхтайвны тухай заалттай зөрчилдөж байгаа. Япон улс өөрийн арми болон дайныг олон улсын мөргөлдөөнийг шийдвэрлэх арга хэрэгсэл болгон эзэмшихээс татгалздаг. Түүнчлэн онц байдлын үед Засгийн газрын эрх мэдлийг өргөтгөх, парламентын гишүүдийн бүрэн эрхийн хугацааг сунгах, үнэ төлбөргүй боловсрол олгох зэрэг төслийг хэлэлцэж байна. Энэ тухай “Иргэдийнхээ амь насыг хамгаалах төрийн үүрэг бол хамгийн чухал үүрэг бөгөөд үүнийг Үндсэн хуульд тодорхой тусгах ёстой” гэж “Киодо” агентлаг мэдээлжээ. 

Эх сурвалж: Монголын үнэн сонин №029/24608/