Азийн өвлийн наадамд 34 орон тамирчнаа илгээж амжилт тогтоолоо

“Харбин-2025” Азийн өвлийн наадам ирэх сарын 7-14-ний хооронд болно. Ес дэх удаагийн наадмын бэлтгэл эртнээс эхэлсэн бөгөөд шинэ ордон барихгүй, хуучин бааздаа түшиглэн зохион байгуулахаа илэрхийлсэн. Азийн өвлийн наадмыг 29 жилийн өмнө Харбинд хүлээн авч байсан учир нөөц бололцоотой. Түүнчлэн жилийн энэ үед өвлийн спортын уралдаан тэмцээн зохион явуулахад тохирох орчин Харбинд бүрддэг. Мөсөн урлалыг үзэж сонирхохоор зорин ирдэг олон орны жуулчид Азийн өвлийн наадамд саатах нь дамжиггүй. Энэ удаагийн наадмыг 11 спортын 64 төрлөөр зохион байгуулна. Уулын цана, биатлон, гүйлтийн цана, кёрлинг, уран гулгалт, фристайль цана, хоккей, шорт трек, тэшүүр, снөүборд, цанаар авирах спорт ес дэх удаагийн наадамд багтжээ. Дөрвөн жилд нэг удаа болдог энэхүү наадамд 34 орны 1500 гаруй тамирчин оролцохоор болсон. Өмнөх наадмуудаас илүү өргөн цар хүрээтэй болж байгаа гэдэг онцлогтойгоор “Харбин-2025” хэдхэн хоногийн дараа нээлтээ хийх гэж байна. Манай улсаас 80 тамирчин Харбиныг зорихоор бэлтгэл сургуулилалтаа хийж байгааг Монголын үндэсний олимпын хорооноос мэдээллээ. Тамирчид энэ удаа биатлон, тэшүүр, шорт трек, уран гулгалт, кёрлинг, уулын болон гүйлтийн цанын төрөлд хурд хүч, авхаалж самбаагаа сорино. Азийн өвлийн наадамд оролцох тамирчдын олонх нь Италийн Турин хотод үргэлжилж буй Универсиадад оролцож байгаа юм. Тамирчид хилийн чанадад бэлтгэл сургуулилалтаа хийж, тэндээсээ олон улсын уралдаан тэмцээнд оролцсоныг спортын зарим холбооноос мэдээлэв.  

Монголын үндэсний олимпын хорооны төлөөлөл кёрлингийн холбооны баг тамирчдын бэлтгэл сургуулилалттай танилцжээ. Спортоор энэхүү төрлөөр эрэгтэй, эмэгтэй 10 гаруй тамирчин тогтмол хичээллэж байгаа бөгөөд өвлийн наадмын кёрлингийн холимог багийн төрөлд Г.Энхзаяа, Б.Баяр нар анх удаа оролцохоор бэлтгэл хангаж байгаа аж. Кёрлингийн тамирчдын хувьд одоогоос гурван жилийн өмнө Финланд улсад болсон өсвөрийн дэлхийн аварга шалгаруулах тэмцээнд бүтэн багаараа оролцсон туршлагатай. Өнгөрсөн оны наймдугаар сард Норвеги улсын Лиллехаммер хотод болсон олон улсын цугларалтад дөрвөн тамирчнаа хамруулжээ. 
Энэ удаагийн наадмыг манай хоккейн баг тамирчид өнжиж байна. Азийн өвлийн наадмын түүхэнд Монгол Улс спортын нэг төрөлд мөнгөн медаль хүртсэнийг 2011 онд Казахстаны Алма-Ата хотод зохион байгуулсан наадамд бөмбөгтэй хоккейн эрэгтэй баг тамирчид авсан байдаг. Зургаан хүрэл медаль хүртсэнийг Монголын цанын тамирчид эх орондоо авчирсан юм. Тодруулбал, 1990 онд Японы Саппоро хотод болсон наадамд эрэгтэй гүйлтийн цаныг баг буухиа төрөлд хүрэл медаль хүртэж байв. Түүнчлэн БНХАУ-ын Чанчүнь хотод 2007 онд болсон наадмын уулын цанын төрөлд хүрэл медалийн эзэн болсон юм. Хамгийн сүүлд буюу 2011 онд Казахстан улсад зохион байгуулсан Азийн өвлийн наадмын цанын зүг чиг олох төрөлд дөрвөн хүрэл медаль хүртсэн амжилттайгаар медалийн жагсаалтад бичигджээ. 
Сонирхуулахад, наадмын бамбар асаах ёслол энэ сарын 21-нд боллоо. Энэ үеэр олон нийтийг цахим бамбарын буухианд оролцохыг уриалав. Цахимаар бамбар өртөөлөгч нь сертификаттай бөгөөд загварыг Сүн Хуа голын мөснөөс санаа авч спортын торгон мөчөөс харуулахыг зорьжээ. “Өвлийн мөрөөдөл, Ази тивийн хайр” уриатай ес дэх удаагийн өвлийн наадмын медалийн нүүрэн хэсэгт мөсөн дээр гулгаж буй тамирчныг, наадмын логотой хамтатган дүрсэлсэн. Харин медалийн ард ес дэх удаагийн Азийн өвлийн наадмыг зохион байгуулж буй Харбин хотын байгалийн үзэмжийг тодотгосноороо онцлогтой болжээ.   

 Б.Сэлэнгэ

 Эх сурвалж: Монголын үнэн сонин №003/24630/