Товчхон

Хөлбөмбөг
Монголын хөлбөмбөгийн холбооноос Грассрүүтс футзалын улсын аварга шалгаруулах тэмцээнийг хөвгүүдийн U12, U11, U10 хүртэлх насны ангиллаар болон охидын U12 хүртэлх насны ангиллаар зохион байгууллаа. Дөрвөн насны ангилалд нийт 1666 тоглогч талбайд тоглосон бол нийт 334 тоглолт болсон тоон үзүүлэлтээрээ Монголын хөлбөмбөгийн холбооны футзалын ордны хувьд дээд амжилт тогтоогоод байна. Цаашид эдгээр насны ангиллын тэмцээнд оролцогчдын тоо жил бүр өсөх хандлагатай байгааг тэмцээн зохион байгуулагчид онцолсон юм.

Жүдо
Монголын жүдо бөхийн холбоо хөл хөдөлгөөн ихтэй байна. Шинэ оны анхны их дуулгад оролцохоор тамирчид бэлтгэлээ базааж, манай бөхчүүдтэй хамтарсан бэлтгэл хийхээр гаднаас зочид иржээ. Шигшээ багийн ахлах дасгалжуулагч Фотех Махмадбеков, “Парис-2024” олимпын наадмын хүрэл медальт, дэлхийн аварга шалгаруулах тэмцээний хүрэл медальт Сомон Махмадбеков, Улаанбаатар, Душанбе их дуулгуудын мөнгө, Токио их дуулгын хүрэл медальт Обид Жебов, Азийн цомуудын аварга Жахонгир Мажидов, Залуучуудын дэлхийн аваргын хүрэл медальт Асадуллоев тэргүүтэй жүдочид шигшээ багийнхантай  бэлтгэлд хамрагдаж байна. Тэднээс гадна ОХУ-ын Красноярск, Тюмен хотын жүдогийн баг тамирчид, Казахстан улсын Абай мужийн жүдо бөхийн багууд хамрагдаж Япон улсын дасгалжуулагч Тацүаки Эгүса бэлтгэлийг удирдаж байна.

Үндэсний бөх
Сумын цолтон болон залуу бөхчүүдийн 121 дэх удаагийн ээлжит барилдаанд 608 бөх уран мэх, авхаалж самбаа сорин барилдсанаас Говь-Алтай аймгийн Бугат сумын харьяат, “Хантайшир” дэвжээний бөх, сумын баяр наадмын гурван түрүүтэй заан Д.Гантөгс анх удаагаа 10 даван түрүүлж, Төв аймгийн Дэлгэрхаан сумын харьяат, “Аварга” дээд сургуулийн бөх, сумын баяр наадмын хоёр түрүүтэй заан Б.Цогт үзүүрлэлээ. Энэхүү барилдаанд АНУ-ын иргэн Лавелл Маршал зодоглов. 

Мөсөн сур
Монголын мөсөн сурын холбооноос 100 сая төгрөгийн шагналын сантай “Лиг” харваа зохион байгуулахаар болжээ. 21 аймаг, Улаанбаатар хот болон дөрвөн улсад салбар зөвлөлтэй тус холбоонд бүртгэлтэй 300 орчим тамирчин мөсөн сурын тэмцээнд тогтмол оролцдог байна. Мөсөн сурыг 2013 оноос спортын төрөлд хамааруулж, цол зэрэгтэй тамирчин олноор төрөн гарчээ. “Лиг” харвааг алсдаа өвлийн олимпын хөтөлбөрт оруулах зорилготойгоо Монголын мөсөн сурын холбооныхон ярьсан юм. 

Сүмо
Японы сүмо бөхийн холбоо дээд зиндааны бөх­чүүдийнхээ тэм­цээнийг Францын нийслэл Парис хотод зохион байгуулах болсноо мэдэгдлээ. Уг тэмцээн 2026 оны зургадугаар сард болох бөгөөд 16 мянган хүний багтаамжтай цэнгэлдэхэд зохион байгуулах аж. Парис хотод өмнө нь 1986, 1995 онд сүмогийн тойргийн барилдаан болжээ. Сонирхуулахад, энэ жил Лондон хотод дээд зиндааны бөхчүүдийн барилдаантай. Ийнхүү сүмочид хоёр жил дараалан гадаадад аялан тоглолт хийхээр болж байна.

 Эх сурвалж: Монголын үнэн сонин №003/24630/