Монголын сагсан бөмбөгийн холбооны Үндэсний дээд лигийн 2023-2024 оны улирлын аварга “Хасын Хүлэгүүд” болон дэд аварга “Бишрэлт Метал” баг 2025 оны Азийн аваргуудын лигт дахин оролцохоор боллоо. Энэхүү мэдээг Дэлхийн сагсан бөмбөгийн холбооноос албан ёсоор зарлажээ. Манай улсын багуудын тоглох бүсэд БНХАУ-ын Тайвань, Тайланд, Малайз, Сингапур, Индонез улсын баг тамирчид багтаж буй бөгөөд хоёр нь л Азийн аваргуудын лигийн финалын шатанд өрсөлдөнө. “Хасын Хүлэгүүд”, “Бишрэлт Метал” багууд гурван удаа зочлон тоглож, ирэх тавдугаар сарын 9-14-ний өдрүүдэд эх орондоо өрсөлдөгч багуудаа хүлээн авах юм. Монголын сагсан бөмбөгийн холбоо энэ талаар мэдээлэхдээ “Өнгөрсөн жилээс Монголын сагсан бөмбөгийн холбооны Үндэсний дээд лиг ФИБА-гаас зохион байгуулдаг BCLAsia /Basketball Champions League Asia/-д өрсөлдөж эхэлсэн ба эхний шатыг Монголдоо зохион байгуулсан. Өөрөөр хэлбэл, МСБХ-ны Үндэсний дээд лигийн багууд Ази тивд зохион байгуулагдаж буй BCLAsia, EASL /East Asia Super League/ гэсэн топ хоёр лигт өрсөлддөг боллоо. Азийн аваргуудын лигт эх орноо төлөөлөн оролцох “Хасын Хүлэгүүд”, “Бишрэлт Метал” багууддаа баяр хүргэж, амжилт хүсье” гэсэн байв.
Эх сурвалж: Монголын үнэн сонин №004/24631/
°C
Сэтгэгдэл (0)
Сэтгэгдэл бичигдээгүй байна