Д.Амарбаясгалан: БОАЖЯ-ны Төрийн нарийн бичгийн дарга Э.Баттулгыг үүрэгт ажлаас нь чөлөөллөө

Засгийн газрын ээлжит хуралдаан боллоо. Хуралдаанаар хэлэлцэн шийдвэрлэсэн асуудлын талаар Монгол Улсын сайд, ЗГХЭГ-ын дарга Д.Амарбаясгалан нар танилцуулж байна.

-Монгол Улсын хэмжээнд нийт ажиллах хүчний 18 хувь нь төрийн албан хаагч байна. Олон улсын хэмжээнд нийт ажиллах хүчний 15 хувь нь төрийн албан хаагч байдаг. Төрийн албаны түвшинд шинэчлэл хийж, 15 хувьд барихаар Засгийн газар бодлого хэрэгжүүлнэ. 

Засгийн газрын төсвийн зардал 40 хувиас хэтэрвэл үрэлгэн гэдэг. Өнөөдөр Засгийн газрын төсвийн зардал 37 хувьтай байна. Тиймээс Засгийн газрын зүгээс 2024 онд төрийн бүтцийг тооцохдоо 40 хувьд барихаар төлөвлөж байна. 

Засгийн газрын хуралдаанаар УИХ-ын гишүүн, ХНХ-ын сайдаар ажиллаж байсан Т.Аюурсайханы өргөдлийг хэлэлцсэн. УИХ-аар хэлэлцүүлсний дараагаар Ерөнхий сайд шийдвэр гаргаж, чөлөөлнө. Мөн БОАЖЯ-ны Төрийн нарийн бичгийн дарга Э.Баттулгыг чөлөөлөхөөр шийдвэрлэлээ. Салбарын сайдаас ирүүлсэн өргөдлийн дагуу уг шийдвэрийг гаргасан. 

Улаанбаатар хотын түгжрэлийн асуудлыг мөн Засгийн газрын хуралдаанаар хэлэлцлээ. Цаашдаа Улаанбаатар хотын хувьд дээрх алдаа, дутагдлыг давтахгүй байх чиглэлийг баримталж, салбарын сайдад үүрэг өглөө. Өнгөрсөн хугацаанд нийтийн эзэмшлийн талбайд барилга барих зөвшөөрөл өгсөн албан тушаалтнуудыг танилцуулж, дахин уг алдааг давтахгүй байх чиглэл өгсөн. 

Н.Энх