Мэндчилгээ

Өдгөө 103 жилийн ойгоо тэмдэглэж байгаа “Монголын үнэн” сонины үе үеийн сэтгүүлч, зохиолч, уран бүтээлчид бол Монгол Улсын өнгөрсөн зууны түүхийг бүтээхэд үлэмж гавьяа байгуулсан хамт олон юм. Тухайлбал, Монгол Улсын тусгаар тогтнол, бүрэн эрхт байдлыг баталгаажуулах, олон өөрчлөлт, шинэчлэлтийг хэрэгжүүлэх, 1921 оны Ардын хувьсгал болон 1990 оны Ардчилсан хувьсгалыг хийхэд онцгой үүрэг гүйцэтгэсэн байдаг. Түүнчлэн Монгол Улсын утга зохиол, урлаг, уран сайхны хөгжилд ч томоохон үүрэг гүйцэтгэж байсан төдийгүй ХХ зууны олон нэрт зохиолчдыг өлгийдсөн байгууллага билээ. Өнөөдөр “Монголын үнэн” сонин цаг үеийн хөгжил, өөрчлөлтийг дагаж чөлөөт хэвлэл, ардчиллын зарчмыг баримталсан Монголын сэтгүүл зүйн салбар дахь нэгэн тоглогч болжээ. Монголын ард түмний 103 жилийн амьдрал, тэмцэл, амжилт бүтээл, алдаа оноо бүхнийг сонины хуудаснаа баримтжуулж, иргэддээ шинэ соргог, мэдээ мэдээллийг цаг хугацаатай уралдан түгээх хариуцлагатай үүргийг нэр төртэйгөөр гүйцэтгэсээр ирсэн үе үеийн ахмад сэтгүүлчид, уран бүтээлчид, ажилтан албан хаагчид Та бүхэнд гүн талархал илэрхийлье. “Монголын үнэн” сонин цаашид ч ард түмэндээ үнэн бодит мэдээлэл түгээж, соён гэгээрүүлэх үүргээ биелүүлсээр байна гэдэгт бүрэн итгэлтэй байна.

Монгол Ардын Намын Ерөнхий нарийн бичгийн дарга Дашзэгвийн Амарбаясгалан