Нийслэлийн ерөнхий боловсролын гадаад хэлний төрөлжүүлсэн сургалттай 23 дугаар сургуулийн 2024-2025 оны хичээлийн жилийн гадаад хэлний нээлттэй өдөрлөг өнөөдөр /2025.04.21/ орос хэлний баяраар эхэллээ. Жил бүр уламжлал болгон зохион байгуулдаг тус өдөрлөг долоо хоног үргэлжлэх бөгөөд 23 дугаар сургуулийн сурагчдын мэдсэн мэдлэгээ бататгаж, багш, эцэг эхчүүддээ тайлагнадаг эрдмийн баяр болон өргөжиж байна.
Нийслэлийн 23 дугаар сургууль нь орос, япон, англи, солонгос, хятад, герман хэлний гүнзгийрүүлсэн сургалттай Монгол Улсын хэмжээнд зургаан хэлийг төрөлжүүлэн судалдаг цорын ганц сургууль гэдгээрээ онцлог. Иймд гадаад хэлний нээлттэй өдөрлөгийг өргөн хүрээнд зохион байгуулж, гадаад хэл сурахын ач холбогдлыг таниулах, судалж буй хэлнийхээ дагуу тухайн орны түүх соёл, ёс заншил, урлаг соёлыг олон нийтэд таниулахад энэхүү өдөрлөг ач холбогдолтой юм.
Гадаад хэлний төрөлжүүлсэн сургалттай 23 дугаар сургуулийн төгсөгчид гадаадын тэргүүлэх их, дээд сургуулиудад тэтгэлгээр суралцаж байгаа нь бахархууштай. Тухайлбал, Орос хэлийг сонгон суралцагч сурагчдаас 2011 оноос хойш 60 гаруй сурагч ОХУ-ын Засгийн газрын 100 хувийн тэтгэлэг аваад байна.
Япон хэлний сурагчид 2014 оноос хойш Япон хэлний түвшин тогтоох олон улсын шалгалтанд 130 гаруй сурагч тэнцсэн бол англи хэлний сурагчид IELTS, TOEFL шалшалтыг амжилттай өгч гадаадын их, дээд сургуулиудын тэтгэлгийг аваад байна. Солонгос хэлний хувьд нийт төгсөгчдийн 40 гаруй хувь нь Солонгосын их, дээд сургуульд элсэн орсон амжилт үзүүлжээ. Мөн Хятад хэлний түвшинчлэлийн шалгалтанд өнгөрсөн хугацаанд 3000-аад сурагч амжилттай тэнцсэн бол герман хэлний олон улсын түвшинчлэлийн шалгалтын оноогоо сурагчид жил бүр ахиулж, “Гёте” институтын 100 тэтгэлгээр 10 гаруй сурагч суралцаж байгаа нь 23 дугаар сургуулийн бахархал юм.
М.Өлзий
°C
Сэтгэгдэл (0)
Сэтгэгдэл бичигдээгүй байна