ПИСА-гийн үнэлгээд манай улсын 7300 гаруй сурагч хамрагджээ

PISA 2022 сурлагын амжилтын олон улсын үнэлгээний дүн гарлаа. Олон улсын эдийн засгийн хамтын ажиллагаа, хөгжлийн байгууллага /OECD/ 2000 оноос хойш PISA үнэлгээг гурван жил тутамд зохион байгуулж ирсэн бөгөөд Монгол Улс анх удаа хамрагдсан юм.

Сурлагын амжилтын энэ удаагийн үнэлгээнд дэлхийн 81 орны 15 настай 690 мянган суралцагч хамрагдсан байна. Манай улсын 196 сургуулийн 7300 сурагч сонгогдон оролцсон юм. Үнэлгээг математик, унших чадвар, байгалийн ухаан гэсэн гурван төрлөөр тогтмол зохион байгуулдаг байна. PISA нь сурагчид суурь боловсрол эзэмших хүртэлх хугацаанд /15 нас хүртэл/ боловсролын байгууллагаар дамжуулан олж авсан мэдлэгээ амьдралд хэрхэн ашиглаж байгааг үнэлдэг юм. 

Ингээд 1.5 жилийн туршид боловсруулалт хийж судалгааны үр дүнг өчигдөр зарласан юм. Энэ үр дүнгээр Монгол Улс 81 орноос дундаж үнэлгээтэй гарчээ. Тодруулбал, математикийн хичээлээр 47, унших чадвараар 65, байгалийн ухааны хичээлээр 53 дугаар байрт эрэмбэлэгджээ. Түүнчлэн PISA 2022 олон улсын сурлагын амжилтын судалгаанд манай улсаас оролцсон 7300 хүүхдийн 2.3 хувь буюу 160 гаруй хүүхэд дэлхийн дээд хэмжээнээс дээгүүр буюу топ гүйцэтгэлтэй үнэлэгдсэн бөгөөд судалгаанд оролцсон, хөгжлийн хувьд ижил төстэй орнуудаа манай улс тэргүүлсэн үнэлгээ авсан байна. PISA үнэлгээнд 2022 оноос бүтээлч сэтгэлгээний сорилууд нэмэлтээр багтсан бөгөөд цаасан болон компьютерт суурилсан хэлбэрээр зохион байгуулдаг байна. Монгол Улс компьютерт суурилсан хэлбэрийг сонгожээ.