Бразилийн Ерөнхийлөгчийн сонгуульд Луис Инасио Лула да Силва хэт барууны үзэлт одоогийн төрийн тэргүүн Жаир Болсонарог 50.9 хувийн саналаар яллаа. Латин Америкийн тэргүүлэх орнуудын нэг Бразил зүүний чиг баримжаатай улс болж байна. Лула Силва 2003-2011 онд төрийн тэргүүнээр ажилласан. Тэрбээр өөрчлөлтийг амлаж байсан ч авлигын дуулианаас болж шоронд хоригдож, 2018 оны Ерөнхийлөгчийн сонгуульд нэр дэвших эрхээ хасуулж байв.
Энэ удаагийн ялалт нь улстөрчийн хувьд гайхалтай эргэн ирэлт боллоо. Лула дэмжигчдийнхээ хамт Сан Паулогийн төвд ялалтаа тэмдэглэж, хэлсэн үгэндээ “Тэд амьдаар минь булах гэж оролдсон. Гэхдээ чөлөөт, шударга, найдвартай сонгуулийн үр дүнд би энд байна. Энэ бол Жаир Болсонарогийн эсрэг ганцхан миний кампанит ажил бус харгислалын эсрэг ард түмний тэмцэл байсан. Бразил улс хэдхэн жилийн дотор хуваагджээ. Бид уур хилэн, үзэн ядалтыг ардаа орхих ёстой. Би бразилчуудын сайн Ерөнхийлөгч байж чадна” гэжээ.
Бразилийн улс төр, нийгмийн талцлыг арилгаж, улс үндэстнээ нэгтгэх нь Лулагийн хамгийн том сорилт болно. Тэрбээр Социал демократ үзэл баримтлалтай Ажилчдын намыг 1980 онд үүсгэн байгуулагчдын нэг. Тиймээс зүүний хүчнийхэн түүний ялалтыг “Амазоны хөндийд ардчилал, хүний эрхийн төлөөх тэмцэл бүрэн утгаараа яллаа” гэж олзуурхаж байна.
Х.Заяа
°C