БНАСАУ армийн бие бүрэлдэхүүнээ Украинд байршуулсан тухай олон улсын хэвлэлүүдэд тал талын байр сууринаас мэдээлж байна. ОХУ, БНАСАУ-ын хооронд иж бүрэн стратегийн түншлэлийн хэлэлцээрт гарын үсэг зурсны дараа уг мэдээ тархсан. Баримт бичигт дурдсанаар талууд аль нэгнийх нь эсрэг түрэмгийлэл үйлдсэн тохиолдолд харилцан туслалцахаар тохиролцжээ. НҮБ-д суугаа БНАСАУ-ын төлөөлөгчийн газар цэрэг илгээсэн тухай цуу яриаг няцаасан. Ийм мэдэгдэл нь тусгаар тогтносон хоёр улсын харилцааг сэвтүүлэх гэсэн оролдлого гэж тодорхойллоо. Украины Ерөнхийлөгч Владимир Зеленский “ОХУ, Иран, Умард Солонгос гэсэн гурван оронтой дайтаж байна” хэмээсэн бол НАТО-гийн Ерөнхий нарийн бичгийн дарга Марк Рютте Умард Солонгосын цэргүүд Украинд байгааг нотлох баримт олдоогүй гэжээ. АНУ-ын Үндэсний аюулгүй байдлын зөвлөлийн зохицуулагч Жон Кирби энэ талаар нарийвчлан судлахыг тагнуулын албандаа даалгасан. Төрийн Думын соёрхон баталсан уг хэлэлцээрт харилцан цэргийн тусламж үзүүлэх тухай заалт багтсан гэж “Уолл Стрийт” сонинд бичжээ. Өмнөд Солонгосын тагнуулын мэдээлснээр, БНАСАУ 10 мянган цэрэг илгээжээ. Ерөнхийлөгч В.Зеленский тус бүр зургаан мянган хүнтэй хоёр бригадын тухай дурдсан байна. НҮБ-ын Аюулгүйн зөвлөлөөс 2016 онд 2770 тоот тогтоол батлан БНАСАУ-ын зааварлагч, зөвлөх, цагдаа, хагас цэрэгжүүлсэн болон цэргийн алба хаагчдыг сургалт, тусгай ажиллагаанд ашиглахыг шууд хоригложээ.
Эх сурвалж: Монголын үнэн сонин №041/24620/
°C
Сэтгэгдэл (0)
Сэтгэгдэл бичигдээгүй байна