В.Путин “Их 20”-ийн уулзалтыг алгасна

“Их-20”-ийн бүлгийн дээд хэмжээний уулзалтыг ОХУ-ын Ерөнхийлөгч В.Путин алгасан, Гадаад хэргийн сайд С.Лавров төлөөлөгчдийн бүрэлдэхүүнээ тэргүүлнэ. Бразилийн Рио-де-Жанейро хотод дэлхийн хамгийн том эдийн засагтай 20 улсын удирдагчдын дээд хэмжээний уулзалт энэ сарын 18-19-нд  болно.  Хэрвээ дээд хэмжээний уулзалтад ОХУ-ын Ерөнхий­лөгч оролцвол нэн даруй баривчлахыг Украины Зас­гийн газар Бразилд уриалсан. Украины Ерөнхий прокурор Андрей Костин “В.Путин тус уулзалтад оролцохоор бэлтгэж байгаа мэдээлэл ирсэн. Үнэхээр тэр улсаасаа гарах зориг гаргаад очвол Бразил улс Олон улсын эрүүгийн шүүхийн Ромын дүрмийг хүлээн зөвшөөрсөн орны хувьд баривчлах үүрэгтэй” гэжээ.

Харин Бразил улс “Их 20”-ийн бүлгийг энэ жил тэргүүлж байгаа бөгөөд дээд хэмжээний уулзалтад бүх удирдагчийг хүлээн авахаа мэдэгдсэн. Түүнчлэн бүлгийн түвшинд ОХУ-ыг үл тоомсорлож болохгүй, олон улсын тавцан дахь Москвагийн ашиг сонирхлыг харгалзан үзэх ёстойг онцолжээ.

Эх сурвалж: Монголын үнэн сонин №043/24622/