Спортын клубүүд Элон Маскийг орхилоо

Дэлхийн супер  баячуудын нэг Элон Маск 2022 онд “Твиттер”-ийг 44 тэрбум ам.доллароор  худалдаж авсан. Тэрбээр энэхүү платформын  бодлогыг өөрчилж, төлбөр тооцоо хийх, хоол захиалах зэрэгт ашиглах боломжтой шинэлэг “Х” гэх олон нийтийн сүлжээ болгосон. Харин АНУ-ын Ерөнхийлөгчийн сонгуулиар Дональд Трампыг илэрхий дэмжсэнээр “Х” чамгүй олон хэрэглэгчээ алджээ. Ялангуяа спортын томоохон клубүүд тус сүлжээн дэх хуудаснуудаа хааж эхэллээ. Олон жилийн турш твиттер (одоогийн X) спортын салбарын маркетингийн үр дүнтэй хэрэгсэл байсаар ирсэн.  Клубүүд, телевизийн сувгууд платформтой албан ёсны түншлэл байгуулж, Үндэсний хөлбөмбөгийн лиг үр дүн, чансаа, статистикийг харуулахын тулд сүлжээнд таб авсан байдаг.  АНУ-ын Ерөнхийлөгчийн сонгуулиас долоо хоногийн дараа Британийн “The Guardian” сонин 27 сая дагагчтай  “X” хуудсаа идэвхгүйжүүлсэн. Мөн зохиолч Стивен Кинг, “Balenciaga”, Жижи Хадид тэргүүтэй алдартан, брэндүүд нийгмийн сүлжээг орхижээ.  Тоон аналитикийн “Similarweb”-ийн мэдээлснээр сонгуулийн дараа АНУ-ын 115 мянган хэрэглэгч Х цахим хуудсаа идэвхгүй болгосон.

 Эх сурвалж: Монголын үнэн сонин №045/24624/