Л.Оюун-Эрдэнэ: МАН хүн төвтэй хөгжлийн бодлого хэрэгжүүлж байна

-Төр, нийгмийн алба хашиж байсан  ахмадуудад хүндэтгэл үзүүлж, тэдний саналыг сонслоо-

“Элдэв эрдэнэт” хэмээх хөхөгчин модон могой жилийн Сар шинийн баярыг тохиолдуулан Монгол Улсын Ерөнхий сайд, МАН-ын дарга Л.Оюун-Эрдэнэ улс төр,  нийгмийн хүндтэй алба хашиж явсан  ахмадуудаа хүлээн авч, хүндэтгэл үзүүллээ.

Хүндэтгэлийн арга хэмжээнд МАН-аас  Ерөнхийлөгч, Ерөнхий  сайд, УИХ-ын дарга, УИХ-ын болон Засгийн газрын гишүүн, аймаг, сум, баг, хорооны удирдлагаар ажиллаж байсан намын 200 гаруй гишүүн оролцлоо.

Парламент улс орны хөгжлийн асуудалд нийгмийн анхаарлыг хандуулж байна

Монгол Улсын Ерөнхий сайд, МАН-ын дарга Л.Оюун-Эрдэнэ арга хэмжээг нээж хэлсэн үгэндээ, “Улиран одож буй луу жилд МАН УИХ-ын сонгуульд  гурав дараалсан ялалт байгуулж, түүхэн амжилтыг бүтээлээ.  Үндсэн хуулийн нэмэлт өөрчлөлтөөр УИХ-ын 126 гишүүнтэй, холимог тогтолцоотой анхны парламентыг байгууллаа. Аймаг, нийслэл, сум, дүүргийн  ИТХ-ын сонгуулиар Улаанбаатар хотод 40 суудал авч, үнэмлэхүй ялалт байгуулсан бол 21 аймгийн 14-т нь МАН ялсан. Луу жилд дэлхийн улс оронд  74 сонгууль явагджээ. Парламентын засаглалтай сонгуульд 50-иас дээш хувийн суудал авсан цорын ганц улс төрийн хүчин нь МАН байна. Үүгээрээ  Ази тив болон дэлхийд дархлагдсан улс төрийн хүчин гэдгээ МАН харуулж чадлаа.

Бүсчилсэн тойргоор явагдсан 126 гишүүнтэй парламент намын институциэр ярилцах соёл руу нэвтэрч байна. Төсвийг алдагдалгүй батлахыг парламент өөрөө шаардаж байна. Тиймээс 2025 оны улсын төсөв алдагдалгүй батлагдсан.  Зарим аймаг боомтгүй, зарим аймаг уул уурхайгүй, зарим аймаг усгүй байдаг. Харин одоо бүсүүдэд хуваагдсанаар  бүгд боомттой, эдийн засгийн интеграцтай болж байна Засгийн газар удахгүй бүсчилсэн хөгжлийн зөвлөгөөнүүдийг зохион байгуулна.  Бүсчилсэн тойрогт орон нутгийн жижиг асуудал ярих биш улс орны хөгжлийн асуудал руу анхаарал хандуулдаг  уур амьсгалыг парламент өөрөө бий болгож байна. МАН “Алсын хараа-2050“ урт хугацааны хөгжлийн бодлогыг дэвшүүлсэн. Энэ бол хүн төвтэй хөгжлийн бодлого.  Үндэсний нэгдмэл үнэт зүйлийг бий болгох, эдийн засгийг хэрхэн төрөлжүүлэх, сайн засаглалтай байх асуудлыг том зургаар нь бид дэвшүүлэн тавьсан. Тийм учраас “Алсын хараа-2050” урт хугацааны хөгжлийн  бодлогоо хэрэгжүүлэхийн тулд МАН 30 дахь их хурлаараа Шинэ сэргэлтийн бодлогыг  дэвшүүлэн тавьж, хэрэгжүүлж байна. Боомтоо өргөтгөх, эрчим хүч экспортлогч орон болох, дундаж давхрагыг тэлэх, авлигын эсрэг шударга ёсыг бий болгох гээд  олон том зорилго, зорилт тавьсан. Шинэ сэргэлтийн бодлогыг  дэвшүүлээд  дөрөв дэх жилдээ орж байна. Бид тогтолцооны реформыг хийж чадлаа. Цаашид энэ тогтолцоогоо бэхжүүлэх шаардлагатай.

Одоо бид Монгол Улсын хөгжил дэвшлийн төлөө шинэ залуу үе хэрхэн төлөвшиж байна вэ, хүн амаа хэрхэн өсгөх вэ гэдэг хүн төвтэй  бодлогуудаа хэлэлцэж байна.  Бид намын их хурлаараа их өгөгдөл болон хиймэл оюун ухааны эрин үед бусад салбаруудаа хэрхэн хөгжүүлэх,  шинэчлэх талаар цаг үеэ мэдэрч, стратегиа боловсруулан шийдвэрлэнэ гэсэн юм.

Их жанжин Д.Сүхбаатарын мэндэлсэн өдрөөр “Анхны долоо”  санг байгуулсан. Энэ сангаар дамжуулан өнгөрсөн үеэ ирээдүй хойчдоо таниулах сурталчилна гэдгээ МАН-ын дарга хэлсэн үгэндээ тодотгов.

Хамтарсан Засгийн газар улс орны хөгжлийг хурдасгах 14 мега төслийг хэрэгжүүлэхээр зорьж байгаа. Өнөөдрийн байдлаар Монгол Улсын Засгийн газар Франц Улсын “Орано Майнинг” компанитай хөрөнгө оруулалтын гэрээнд,   Гашуунсухайт-Ганцмод боомтын хил дамнасан төмөр замыг холбох Монгол Улсын Засгийн газар, БНХАУ-ын Засгийн газар хоорондын хэлэлцээрт талууд гарын үсэг зураад байгаа билээ.  Ерөнхий сайд, МАН-ын дарга Л.Оюун-Эрдэнэ хэлсэн үгэндээ олон намын, нийгмийн олон төлөөлөлтэй парламент бүрдсэн, сонгуульд ялж олон суудал авсан МАН улс төрийн бусад намтай хамтарсан Засгийн газар байгуулсан нь улс орны өмнө тулгамдаад буй томоохон асуудлыг шийдвэрлэх, 14 мега төслийг эхлүүлэх боломжтой цаг үе  гэдгийг онцолсон юм.

Я.Содбаатар: Намын гишүүдийн оролцоог хангаж, гишүүн бүрд хүрч ажиллана

Дараагаар нь МАН-ын Ерөнхий нарийн бичгийн дарга Я.Содбаатар  ахмадууддаа Сар шинийн мэндчилгээ дэвшүүлж, үг хэллээ. Тэрбээр “Энэ өдрүүдэд улс төрийн ууган хүчин МАН үүсэн байгуулагдсаны 104 жилийн ойг улс орон даяар тэмдэглэн эхэлж байна.  МАН үүсэн байгуулагдсаны 104 жилийн ойн мэндийг та бүхэнд дэвшүүлье. Энэ жил намаас их жанжин Д.Сүхбаатарын мэндэлсний 132, маршал Х.Чойбалсангийн 130 жилийн ойг тохиолдуулан хүндэтгэлийн арга хэмжээг зохион байгуулж, тусгаар тогтнолын үнэт зүйл, үзэл санааг түгээн дэлгэрүүлэх “Анхны долоо” санг байгууллаа. Энэ сан оюутан, залуусын сургалтын тэтгэлэг, эрдэмтэн судлаачдын бүтээл туурвил, иргэдийн улс төрийн боловсролыг дээшлүүлэх зэрэгт үйл ажиллагаагаа чиглүүлэх юм.

Ардын хувьсгалыг манлайлж, Ардын намын байгуулсан тусгаар тогтнолын Их долоон зүтгэлтэн эх орончдоороо дамжуулан хүүхэд, залуучууд ард иргэдэд бид бүхэн тусгаар тогтнол, эх оронч үзэл санааг түгээн дэлгэрүүлэх болно. Өнгөрсөн зуунд монголчууд тусгаар тогтнолоо баталгаажуулж, бүрэн эрхт, тусгаар тогтносон Бүгд найрамдах улсаа байгуулж чадсан бол XXI зуунд эдийн засгийн тусгаар тогтнолоо баталгаажуулах учиртай.  МАН-ын бодлого, үйл ажиллагаа ч үүнд чиглэж байна.

Энд хүрэлцэн ирсэн та бүхэн бол өнгөрсөн түүхэн хугацаанд улс орныхоо хөгжил цэцэглэлтийн төлөө, тухайн салбар, аймаг орон нутгаа удирдан манлайлж, хүн ардаа соён гэгээрүүлж, аж ахуй, үйлдвэр завод, зам харилцааг барьж байгуулахад энэ амьдралаа зориулсан нам, төрийн зүтгэлтнүүд, өнөөгийн Монголыг бүтээн бий болгож бидэнд авчирсан гавьяат үйлстнүүд билээ.

Би МАН-ын Ерөнхий нарийн бичгийн даргаар сонгогдоод 17 аймгаар явж, ард иргэдтэй уулзалт хийж, намын гишүүдийн санал бодлыг сонслоо. Намын гишүүдийн идэвхтэй оролцоог хангаж, гишүүн бүрд хүрч ажиллаж, тэдний саналд тулгуурлан бодлого, шийдвэрээ гаргаж байх нь намын хөгжил, ялалтын үндэс гэж бодож байна.

Намын ажил бол хүндээ л хүрч ажиллах ажил гэж та бүхэн сургасан. Манай нам бол ахмад дунд, залуу үеийн алтан хэлхээнд оршдог гэж та бүхэн үлгэрлэн харуулсан. Тиймээс өнөөдрийн намын удирдлагууд та бүхнээ хүндэтгэж, санал бодлыг сонсож байх болно гэлээ.

Энэ жил МАН-ын 31 дэх их хурал хуралдахаар төлөвлөжээ.  Энэ хурлаар намын хөгжлийн стратеги “Agenda 2.0” хөтөлбөр, “Бүтээмжийн гурван шилжилт” хөгжлийн стратегийг батлан гаргахаар ажиллаж байгаа аж. МАН-ын Ерөнхий нарийн бичгийн дарга Я.Содбаатар ахмадуудад хандаж дээрх  хөтөлбөрийн хэлэлцүүлэгт саналаа өгөхийг уриалав. 

Б.Гомбо: Ахмадуудын хувь нэмэр, нөлөөлөл их

Хүндэтгэлийн арга хэмжээнд оролцсон МАН-ын дэргэдэх Социал демократ Ахмадын холбооны дарга Б.Гомбо  хэлсэн үгэндээ “Өнөөдрийн ахмадууд бол Монголын шилдэг залуусын төлөөлөл. Яагаад гэвэл бидний залуу насанд хамгийн шилдэг охид, хөвгүүдийг өндөр шалгуураар  МАН-д элсүүлдэг байлаа. Тэр үеэс хойш та бүхэн улс орны хөгжлийн төлөө өөр өөрсдийн салбараа хошуучлан тэргүүлж ирсэн байдаг. Та бүхэнтэйгээ уулзаж, учрахад сайхан байна. Социал демократ Ахмадын холбоо МАН-ын бодлого, шийдвэрийг дэмжин дэлгэрүүлэх, хэрэгжүүлэх үйлсэд туслах үүрэгтэй. Тийм учраас бид ахмад гишүүдээрээ дамжуулж, үе үеийн сонгуульд МАН-д ялалт, амжилт авчрахын төлөө ажиллаж ирлээ. Та бүхэн бол МАН-даа чин үнэнчээр зүтгэж ирсэн манай ахмад гишүүдийн тэргүүлэгч нар. Манай холбоо ахмад гишүүдээрээ юу хийлгэх вэ,  ямар нөлөөтэй байна вэ гэдэг судалгааг хийсэн. Өнгөрсөн орон нутгийн сонгуулиар ахмад гишүүдийн өгсөн санал 50 гаруй хувийг эзэлж байна. Энэ нь манай ахмад гишүүд ямар их нөлөөтэй байна вэ гэдгийн илэрхийлэл. Хөдөө, орон нутагт ахмад лидерүүд чухал үүрэг гүйцэтгэж байна. Жишээлбэл, Хөвсгөл аймгийн Шинэ-Идэр сумын ИТХ-ын  21 суудлыг манай нам дангаараа авч, 100 хувь ялалт байгуулсан байна. Улаанбаатар хотод Сонгинохайрхан дүүргийн ИТХ-ын 43 суудлыг МАН дангаараа авсан. Судалгаагаар манай ахмадуудын оруулсан хувь нэмэр, нөлөөлөл өндөр байна гэлээ.

МАН-ын дэргэдэх Социал демократ Ахмадын холбоо байнгын үйл ажиллагаатай гэдгийг тэрбээр онцоллоо. Тус холбоо МАН-ын дарга, Ерөнхий сайд Л.Оюун-Эрдэнийн тэргүүлсэн Засгийн газрын бүсчилсэн хөгжлийн бодлогын хэрэгжүүлэхээр Ноос, ноолуурын Монголын нэгдлийн холбоотой санамж бичиг байгуулан ажиллаж байгаа аж. Мөн  “Тэрбум мод” хөдөлгөөн, “Цагаан алт” хөтөлбөрийн хүрээнд  21 га газрыг моджуулахаар Улаанбаатар хотын Захирагчийн албатай хэлэлцэл хийж байгаа гэнэ. Түүнчлэн Японы “ЖАЙКА” байгууллагатай хамтран монгол хүний амьдралын чанарыг дээшлүүлэх чиглэлээр  төсөл хэрэгжүүлэхээр ажиллаж байгаа юм байна.

Хүндэтгэлийн арга хэмжээний үеэр УИХ-ын даргаар ажиллаж байсан Д.Дэмбэрэл, намын даргаар ажиллаж байсан Б.Даш-Ёндон нарын хүндтэй эрхмүүд үг хэллээ. Мөн арга хэмээнд оролцсон ахмадуудын намын удирдлагуудтай санал бодлоо солилцсон юм.

Н.Энхбат 

Эх сурвалж: Монголын үнэн сонин №008/24635/