Тайзаа эзэгнэж, загвар зохион бүтээгчийн урласан хувцсыг “амьдруулж” чаддаг моделиудын нэг нь С.Төгс. Чамин хээнцрээс хол, брэнд хөөцөлддөггүй түүнийг моделийн хувьд цагаан цаастай зүйрлэмээр. Загвар зохион бүтээгчийн орон зайг мэдэрч, ажиллах боломжийг бүрдүүлдэг нь С.Төгсийн онцлог ажээ. Шинэ оноо дэлгэцийн шинэ бүтээлээр эхлүүлж буй түүнийг хэдэн хором хүлээлгэлээ. Кино, загвар гээд сэдэвт хязгаарлагдахгүйгээр бидний ярилцлага өрнөсөн юм.
-Таны одоо бүрдүүлээд байгаа имижээс ярилцлагаа эхэлье. Юунд зориулж энэ өнгө төрхийг бүрдүүлсэн бэ?
-Юуны түрүүнд намайг ярилцлагын зочноор урьсанд баярлалаа. Миний дүр бүтээсэн “Нийслэл хүүхэн: Бал сар” киноны нээлт саяхан болсон. Кинонд оролцон тоглосон уран бүтээлчид нээлтийн ёслолын үеэр хар, цагаан өнгө хослуулахыг сонсоод би хослол өмсье гэж бодсон юм. Гэхдээ энгийн хослол өмсөхийг хүсээгүй. Хэт задгай биш мөртлөө биеийн зарим хэсгийг ил гаргасан байдлаар хувцсаа тохируулсан. Загварын арга хэмжээ биш киноны нээлт гэдгийг бодолцож хослолынхоо загварыг гаргасан юм. Хэрвээ загварын арга хэмжээ байсан бол илүү задгай хувцаслах байсан.
-Стиль имижээ бүрдүүлэхэд баримталдаг зарчим танд бий юү?
-Ямар үйл ажиллагаанд оролцох, надтай хэн хамт байгааг бодолцож хувцсаа сонгодог. Ер нь бол хэн нэгнийг эвгүй байдалд оруулахгүй байхыг хичээдэг. Дээр нь өндөр хүний онцлог гэж бий. Өндөр хүмүүс чинь хүссэн хувцсаа өмсөж болдоггүй юм шүү дээ. Бага зэрэг чимэг ороход л их сүртэй харагдах гээд байдаг талтай. Тиймээс тухайн орчноос шалтгаалж хэрхэн хувцаслахаа шийддэг.
Ямар нэг зүйлд хайрцаглагдаад ирэхээр хэн нэгэн намайг багалзуурдаад байгаа юм шиг санагддаг
-Уг нь та яг л салхи шиг хүн. Ямар нэг зүйлд хайрцаглагддаггүй юм шиг санагддаг?
-Намайг сайн ажиглажээ. Үнэхээр тийм. Ямар нэг зүйлд хайрцаглагдаад ирэхээр хэн нэгэн намайг багалзуурдаад байгаа юм шиг санагддаг. Би чинь өөрчлөлт шинэчлэлгүйгээр амьдралыг төсөөлж чаддаггүй хүн.
-Гэхдээ таны саяхны кино нээлтэд бүрдүүлсэн өнгө төрх даруухан бөгөөд дэгжин, их содон харагдлаа. Дизайнерын нүд хурц байж чаджээ?
-Их баярлалаа. Ямар нэг үйл ажиллагаа юм уу нэвтрүүлэгт орохдоо өмсөх хувцасныхаа загварыг би өөрөө гаргадаг. Бас миний загварыг ойлгоно гэж бодсон загвар зохион бүтээгч эсвэл брэндтэй хамтран ажилладаг юм. Киноны нээлтийн үеэр өмссөн хувцсыг “O Couture” брэндийнхэн маань хийж өгсөн. Миний юу хүсэж байгааг ойлгож яг хүссэн загвараар хувцас урлаж өгсөнд баярлалаа гэж хэлье. Хэдийгээр би загвараа гаргадаг ч яг миний бодсоноор хийнэ гэдэг амаргүй. Тиймээс намайг ойлгох загвар зохион бүтээгч, брэнд байна гэдэг сайхан хэрэг л дээ.
-“Нийслэл хүүхэн: Бал сар” уран сайхны киноны улаан хивсний ёслолд та содон зочин байсан. Өмнө нь дэлгэцийн бүтээлд тоглож байв уу?
-Ганц хоёр дэлгэцийн бүтээлийн зураг авалтад оролцож байсан. Харин энэ удаагийн кино юугаараа ялгаатай вэ гэхээр би “Нийслэл хүүхэн: Бал сар” киног амьдралынхаа нэг хэсэг болгоё гэж бодсон. Бас ажил хэрэг болгоё гэж шийдсэнээс хойш тоглосон анхны кино болж байна.
-Тайз дэлгэцийн шилдэг уран бүтээлчидтэй нэг баг болон хамтран ажиллахад ямар сэтгэгдэл төрж байв?
-Дор бүрнээ өөрийн ажил үүргийг мэддэг бага их сайхан юм билээ. Ийм гоё багийн нэг хэсэг нь болсондоо их баяртай байгаа. Ер нь анхны бүх зүйл гоё байдаг. Миний хувьд “Orange entertainment”-ын бүтээл анхны кино маань байсанд баяртай байна.
Кино, дэлгэцийн салбарынхны хувьд би шинэ, залуу нь шүү дээ
-Загвар болон дэлгэцийн тайзны ялгаа, онцлог нь юу гэж бодогдов?
-Мэдээж өөр байлгүй яах вэ. Одоо бол би загварын тайзан дээр ахмад гэж хэлэгдэхээр болсон. Бүх хүнийг танина, ямар ч ажил байсан саадгүй хийчихнэ. Харин кино, дэлгэцийн салбарынхны хувьд би шинэ, залуу нь. Тэгэхээр ийм тодотголтойгоор “Нийслэл хүүхэн: Бал сар” кинонд тоглох их шинэлэг санагдсан. Сурах зүйл ч их байгааг мэдлээ.
-2023 он таны хувьд их сонирхолтой байдлаар эхэлж байна. Үүнээс гадна оролцохоор төлөвлөж байгаа онцлог үйл явдлаасаа танилцуулж болох уу?
-2023 он миний хувьд их завгүй жил болно. Энэ асуултад дараа нь илүү дэлгэрэнгүй хариулъя.
-Та загварын ертөнцөд өөрийн орон зайг бий болгосон загвар өмсөгч. Цаашид таны гэсэн брэндийг үүсгэн байгуулах уу. Бодлоосоо хуваалцаач?
-Энэ бас нууц хэвээр үлдэг. Мэдээж өөрийн гэсэн бизнестэй болохын төлөө хичээнэ.
-Нэгэнт ярилцсаных, амьдралын тань нэгэн тод өнгө болсон охины тань талаар асуумаар байна. Ээж шигээ багаасаа хөгжим, бүжгээр хичээллэж байгаа юу?
-Охин маань одоо 10 настай. Сагсан бөмбөг тоглох дуртай, их хөөрхөн зөрүүд. Том болох тусам л түүний талаарх мэдээллийг сошиалд тавихаар харамлаад байдаг болсон. Дараа нь том болохоороо өөрийнхөө талаар ярих байх. Хүсээгүй байхад нь мэдээлэл өгөхөөр охиныхоо эрхийг зөрчөөд байгаа юм шиг санагддаг.
-Охинтойгоо цагийг хамт өнгөрүүлэхдээ юунд илүү анхаарч тайлбарлахыг хичээдэг вэ?
-Би охинтойгоо яг л найз шиг нь харилцдаг. Өнгөрсөн 10 жилийн хугацаанд нэг ч удаа дуугаа өндөрсгөж үзээгүй. Цаашдаа ч тийм л байхыг зорьдог ээж.
-Ирээдүйгээ төлөвлөхөд хэрхэн анхаарал хандуулж байгаа талаар асууж ярилцлагаа өндөрлөе.
-Бодсон зүйл олон бий. Гэхдээ ярихгүй, хийж үзүүлнэ ээ.
Б.Сэлэнгэ
Эх сурвалж: Монголын үнэн сонин №003/24534/
°C