Монгол Улсад улс төрийн нам үүсгэн байгуулагдсаны 102 жилийн ойд зориулсан “ШИЛЭН НАМ” эрдэм шинжилгээ, онол практикийн хурал өнөөдөр Төрийн ордонд эхэллээ. Эрх баригч МАН болон НҮБ-ын Хөгжлийн хөтөлбөрийн "Шийдвэр гаргах түвшинд жендэрийн тэгш байдал, эмэгтэйчүүдийн оролцоог дэмжих нь" төсөл зэрэг Олон улсын байгууллагуудтай хамтран зохион байгуулж байгаа хурлыг нээж МАН-ын дарга, Ерөнхий сайд Л.Оюун-Эрдэнэ үг хэллээ.
Монгол Улсын Засгийн газар 2023 оныг Авлигатай тэмцэх жил болгон зарлаж, Сар шинийн баярын өмнө 5Ш ажиллагаа явуулах тухайгаа мэдэгдсэн. Монгол Улсад улс төрийн нам байгуулагдсан энэ өдөр “Шилэн нам” эрдэм шинжилгээ, онол практикийн бага хурал зохион байгуулж, нийгэм-эдийн засагт нүүрлэсэн авлига, хээл хахууль, системийн авлига, улс төрийн намуудын санжүүжилт зэрэг асуудлыг “шилэн” болгох шаардлага гарч ирж байгааг Ерөнхий сайд хэлсэн үгэндээ дурдлаа.
Мөн Засгийн газар 5Ш ажиллагааны нэг болох “Шувуу” ажиллагааны хүрээнд авлига, албан тушаалын гэмт хэрэгт шалгагдах явцдаа гадагшаа гараад эх орондоо эргэж ирээгүй хүмүүсийн нэрсийг ирэх долоо хоногт зарлаж, шаардлагатай арга хэмжээнүүдийг авах тухайгаа мэдэгдлээ. Энэхүү “Шилэн нам” хэлэлцүүлэг нь авлига ургаж буй хөрсийг орвонгоор нь өөрчлөх реформын эхлэл гэдгээрээ хамгийн чухал ач холбогдолтой хэмээн үзэж байна хэмээв.
Дараагаар нь "Авлигын индексийн үзүүлэлт ба улс төрийн намуудын ил тод байдал" сэдвээр "Транпэрэнси Интернэшнл Монгол" ТББ-ын Гүйцэтгэх захирал Э.Мөнхжаргал илтгэл тавьж, хэлэлцүүлж байна.
°C