Өмнөд Вьетнамыг чөлөөлж, Вьетнам Улсыг нэгтгэсний түүхт 50 жилийн ойг тус улсын нам, төр засгийн зүгээс үндэсний хэмжээнд өнөөдөр буюу 2025 оны дөрөвдүгээр сарын 30-нд ёслол төгөлдөр тэмдэглэн өнгөрүүлж байна. Уг түүхэн ойд зориулсан баярын арга хэмжээнд Монгол Ардын Намын Ерөнхий Нарийн Бичгийн дарга Я.Содбаатар тэргүүтэй төлөөлөгчид хүндэт зочны хувиар урилгаар оролцож байна.
Баярын арга хэмжээний хүрээнд энэ дөрөвдүгээр сарын 29-нд Вьетнамын Коммунист Намын Төв хорооны Ерөнхий Нарийн Бичгийн дарга То Лам олон улсын төлөөлөгчдийн тэргүүн нар болон дэлхийн 20 гаруй орны улс төрийн намуудын төлөөлөгчдийг хүлээн авч уулзав.
Энэ үеэр Монгол Ардын Намын Ерөнхий Нарийн Бичгийн дарга Я.Содбаатар хүндэт зочны хувиар олон улсын төлөөлөгчдийг төлөөлөн арга хэмжээг нээж үг хэллээ.
Тэрбээр хэлсэн үгэндээ Вьетнамын ард түмний эх оронч тэмцэл, үндэсний эв нэгдлийг бахархан тэмдэглэж, Монгол Улсын Ерөнхийлөгч У.Хүрэлсүхийн болон Монголын ард түмний чин сэтгэлийн баярын мэндчилгээг уламжлав.
Мөн тэрбээр Вьетнам Улсын нийгэм, эдийн засгийн салбарт хэрэгжүүлсэн “Дой Мөй” шинэчлэлийн бодлогын амжилтыг өндрөөр үнэлж, Вьетнам Улс 2030 он гэхэд дундаж орлоготой хөгжиж буй орон болох, 2045 он гэхэд өндөр орлоготой хөгжилтэй орнуудын эгнээнд багтах зорилтоо амжилттай биелүүлнэ гэдэгт итгэлтэй байгаагаа илэрхийлэв. Түүнчлэн Монгол, Вьетнамын уламжлалт найрсаг харилцаа сүүлийн жилүүдэд эрчимтэй хөгжиж байгааг онцолж, 2024 онд хоёр улсын хооронд тогтоосон “Иж бүрэн түншлэл”-ийн харилцааг худалдаа, эдийн засаг, хөрөнгө оруулалт зэрэг бүхий л салбарт өргөжүүлэн хөгжүүлэхийн чухлыг тэмдэглэв.
Эх сурвалж: Nam.mn
°C
Сэтгэгдэл (0)
Сэтгэгдэл бичигдээгүй байна