Л.Оюун-Эрдэнэ: Тогтолцоогоо өөрчлөхгүй бол төрийн шийдвэр ордонд биш архины ширээний ард гарна

Монгол Улсад улс төрийн нам үүсгэн байгуулагдсаны 102 жилийн ойд зориулсан “Шилэн нам” эрдэм шинжилгээ, онол практикийн хурал өнөөдөр Төрийн ордонд болж байна. Эрдэм шинжилгээний хурлыг нээж Монгол Улсын Ерөнхий сайд, МАН-ын дарга Л.Оюун-Эрдэнэ үг хэллээ. Дараагаар нь  "Авлигын индексийн үзүүлэлт ба улс төрийн намуудын ил тод байдал" сэдвээр  "Транпэрэнси Интернэшнл Монгол" ТББ-ын Гүйцэтгэх захирал Э.Мөнхжаргал илтгэл тавилаа. Илтгэлтэй холбогдуулан улс төрийн намуудын төлөөлөл байр сууриа илэрхийлсэн юм.

Сонгуулийн холимог тогтолцоог дэмжинэ                

Эрх чөлөөг хэрэгжүүлэгч намын дарга Ш.Төмөрсүх: Өнөөдрийн хэлэлцүүлэгт  МАН-ын дарга, Ерөнхий сайд Л.Оюун-Эрдэнэ оролцож байгаа нь улс төрийн намууд үгээ хэлэх боломж нээгдэж байна. Сонгуулийн холимог тогтолцооны талаар Л.Оюун-Эрдэнэ дарга ярилаа.  Эрх чөлөөгч хэрэгжүүлэгч нам сонгуулийн холимог тогтолцоог дэмжинэ. Гэхдээ тухайн нам гэмт хэрэгт холбогдсон хүнийг жагсаалтад оруулахгүй байх талаар заалт оруулж өгөх хэрэгтэй. Бүх иргэнийг сонгуулийн санал өгүүлдэг байх заалтыг оруулж өгмөөр байна.

АН-ын дарга Л.Гантөмөр дарга намынхаа авлига авсан гишүүдийн нэрсийг гаргаж зарла

Монгол Консерватив намын дарга Н.Дашдаваа: Авлига бол хүн төрөлхтний эсрэг гэмт хэрэгт. Бид авлигатайгаа олон жил тулалдаж байна. Ардын нам дотор байгаа авлига авсан гишүүдийн жагсаалтыг бүгдийг гаргах хэрэгтэй. АН-ын даргаар шинээр сонгогдсон Л.Гантөмөр дарга намынхаа авлига авсан гишүүдийн нэрсийг гаргаж зарла. Сонгуулиар эрдэм мэдлэгтэй, шударга хүнээ нэр дэвшүүлэх хэрэгтэй.

 Үндсэн  хуулийн өөрчлөлтийг яаралтай хийх шаардлагатай байна

ХҮН-ын Удирдах зөвлөлийн гишүүн Д.Үүрцайх: Улс төр мөнгөнөөс хамааралтай байна гэдэг тусгаар тогтнолд хамаарна. Улс төрийг мөнгөний хамаарлаас гаргах санаачилга идэвхжиж байгаад баяртай байна. Үндсэн хуулийн нэмэлт, өөрчлөлтийг яаралтай хийх шаардлагатай байна. Үүнийг дагаад Сонгуулийн тогтолцоо, Улс төрийн намын хуулийг өөрчлөх ёстой.

Төр бүрдэж байгаа процесс бохир мөнгөөр бүрдээд байвал бид цааш явахгүй

Монгол Улсын Ерөнхий сайд, МАН-ын дарга Л.Оюун-Эрдэнэ:

-Монгол Улс системийн авлигын асуудалтай нүүр тулсныг хүлээн зөвшөөрсөн. Үүнтэй холбоотой Монгол Улсын Засгийн газраас 2023 оныг “Авлигатай тэмцэх жил” болгон зарласан. Манай уул уурхайн компани экспортын 93 хувийг бүрдүүлдэг. Хэдхэн уул уурхайн компани,  банкны захирлын ард сонгуулийн санхүүжилт бий болоод 20 гаруй жил боллоо. Тэд сонгуулийн даргаар хууль, шүүхийн байгууллагын томилгоонд өөрсдийн хүнийг оруулдаг.

Үүнийг нэг илэрхийлэл нь “Эрдэнэт”-ийн 49 хувь. Шүүх нь томилсон хүмүүсийнхээ эсрэг шийдвэр гаргаж чадахгүй байна. Энэ бол бодитой кейс. Цаашдаа бид яаж явах вэ. Хэрвээ энэ янзаар явбал цаашдаа Төрийн ордонд шийдвэр гарахгүй. Төрийн ордон тойрсон том байшингуудын дунд, архины ширээний ард шийдвэр гарна.

Сонгуулийн холимог тогтолцоог 50:50 байх реформын шинэчлэл хийхээр ярилцаж байна. Мажаротари тогтолцоо байсан тохиолдолд нутгархаг үзэл байдаг. Мөн иргэдэд “хаалгаар хөөгөөд явуулахаар тооноор оород ирвэл яах вэ” гэсэн болгоомжлол байна.

Төр бүрдэж байгаа процесс бохир мөнгөөр бүрдээд байвал бид цааш явахгүй. Эдийн засаг тэлэх тусам сөргөөр нөлөөлнө хэмээв.

Хэлэлцүүлэг үргэлжилж байна.

Н.Нягт