Монгол Улсад орчин цагийн улс төрийн байгууллага үүсэн байгуулагдсаны 102 жилийн ой энэ долоо хоногт тохиолоо. 300 мянган гишүүнтэй эрх баригч Монгол ардын нам “Эх орончдын өдөр”-өөр цахим шилжилт хийснээ зарлав. “Цахим нам 2.0” системийг нэвтрүүлснээрээ гишүүний сахилга хариуцлага, ёс зүйн хэм хэмжээ нь эрс дээшилж, намын үйл ажиллагаа нь цахимд шилжиж шилэн, ил тод болно гэдгээ мэдэгдлээ.
МАН 2021 оны арванхоёрдугаар сард болсон 30 дахь Их хурлаараа Монгол Улсад олон намын тогтолцоог хөгжүүлэх зорилгын хүрээнд бусад намуудыг манлайлан ажиллах гишүүн төвтэй нам, цахим нам, нээлттэй нам, дэвшилтэт нам, бодлогын нам болох томоохон зорилтуудыг дэвшүүлж байсан билээ. Ийнхүү дэлхийн чиг хандлага, олон улсын улс төрийн намуудын жишигт нийцэн ажиллах зорилгодоо хүрэхийн тулд МАН “Цахим нам 2.0” системээ үйл ажиллагаандаа бүрэн нэвтрүүлээд байна.
“Цахим нам 2.0” системийг зөвхөн гар утасны аппликейшн, веб хуудсаар төсөөлж болохгүй. Энд гишүүнчлэлийн систем, дотоод үйл ажиллагааны E-office, хяналт удирдлагын систем, дуудлага мэдээллийн “Call center”, Цахим сургалтын систем болон намын дэргэдэх “Тинк танк” байгууллагуудын судалгааны материал, ном товхимлуудын цахим хувилбар, цахим номын сан зэрэг олон үйлчилгээ багтжээ.
Улс төрийн намуудын нэр хүнд сүүлийн жилүүдэд олон нийтийн дунд илэрхий буурсан. Улс төрийн намд итгэх иргэдийн итгэл буурч буйг судалгааны дүнгүүд ч харуулах болсон. Гэсэн хэдий ч энэ нь Монгол Улс улс төрийн намгүй болно гэсэн үг биш юм.
Учир нь улс төрийн намууд парламентын сонгуульд Мөрийн хөтөлбөр дэвшүүлэн оролцдог. Дэвшүүлсэн мөрийн хөтөлбөрт туссан зорилго, зорилтоо ард иргэддээ танилцуулан, санал авч, сонгуулийн үр дүнгээр ялсан нам Засгийн газраа байгуулдаг парламентын ардчилсан тогтолцоотой улс.
Парламентын амин сүнс нь улс төрийн намууд байдаг учраас намуудын өмнө өөрсдийгөө байнга хөгжүүлж, шинэчлэх шаардлага тулгарч байдаг. Тиймээс улс төрийн хүчнүүд дэвшилтэт бодлогын нам болон төлөвших, эх орноо хэрхэн, яаж хөгжүүлэх вэ гэсэн бодлогоор өрсөлддөг хөгжлийн шинэ шат руу алхахаас өөр сонголтгүй болж буй юм.
Технологийн энэ эрин зуунд дэлхийн олон улс орны улс төрийн намууд цахим шилжилт хийж, технологийг өдөр тутмын үйл ажиллагаа болон намын гишүүд, дэмжигчидтэйгээ харилцах гүүр болгож хэвшүүллээ. Цаг үеийн өөрчлөлтийг даган Монголын улс төрийн намуудад ч олон улсын улс төрийн намуудтай хөл нийлэх шаардлага тулгарч буй нь үнэн.
Яг ийм цаг үед эрх баригч МАН Монгол Улсад үйл ажиллагаа явуулж буй улс төрийн хүчнүүдээс анхлан Цахим нам болж гишүүний сахилга, хариуцлага, ёс зүйн хэм хэмжээнд тодорхой босго тавьж, намын үйл ажиллагааг шилэн, ил тод нээлттэй болгож байна.
°C